„ის, რაც ახლა ხდება - ეს პოლიტიკური იწილო-ბიწილო - ხალხისთვის არ ხდება, ყველა პარტია, ყველა მოთამაშე, კონფლიქტში ჩართული ყველა პირი ელაპარაკება ბიძინა ივანიშვილს“ - ამის შესახებ guardian.ge-ს პოლიტოლოგმა, გია ხუხაშვილმა განუცხადა.

ხუხაშვილის შეფასებით, ივანიშვილს შესაძლოა არ სურს, თუმცა იძულებულია ჩაერთოს მიმდინარე პოლიტიკურ პროცესებში.

„იმის მიუხედავად, ჩართულია თუ არა ამ პროცესებში ბიძინა ივანიშვილი, უნდა ითქვას, რომ მთელი ეს პროცესები მიმდინარეობს იმიტომ, რომ ივანიშვილზე ხდება აპელირება. ყველას მიაჩნია, რომ მათი სტაბილურობის წყარო არის ბიძინა ივანიშვილი. შესაბამისად, მასზე ხდება აპელირება. თავად ივანიშვილი არა მგონია რამის ინიციატორი იყოს, ეს ადამიანები ითრევენ მას ამ პროცესში. გამომდინარე იქედან, რომ ის სტაბილურობის ერთადერთი გარანტია, ბუნებრივია, მას მოუწევს ამ პროცესებში რაღაცნაირად მონაწილეობის მიღება. ეს არა იმიტომ რომ მას ეს უნდა, უბრალოდ ის იძულებულია პროცესებში ჩაერთოს“ - განმარტა ხუხაშვილმა.

პოლიტოლოგი guardian.ge-სთან საუბრისას თოფაძე-რესპუბლიკელებს შორის არსებულ პოლემიკასაც გამოეხმაურა და აღნიშნა, რომ თოფაძე კოალიციაში მყოფი ბევრი ადამიანის აზრს ახმოვანებს.

„ეს დაპირისპირება არ დაწყებულა ახლა, ამას ბევრად მეტი წახნაგი აქვს, ვიდრე ჩანს. გოგი თოფაძემ თქვა ის, რასაც ბევრი ფიქრობს კოალიციაში. ეს კონფლიქტი არსებობს კოალიციის დაარსების დღიდან. უბრალოდ არჩევნების წინ, ეს ვეღარ დაეტია კულისებში და გადმოიღვარა საჯარო სივრცეში“ - განაცხდა გია ხუხაშვილმა.