"არა გაზპრომს" - ამ ლოზუნგით რუსეთის ფედერაციის საელჩოს ყოფილ შენობასთან "ერთიანი ნაციონალური მოძრაობის" მიერ ორგანიზებული "ცოცხალი ჯაჭვის" აქცია დასრულდა. ე.წ. ცოცხალ ჯაჭვში მდგომ მოქალაქეებს მიტანილი ჰქონდათ ბანერები და ლურჯი ბუშტები, წარწერით "არა, გაზპრომს". აქციაზე იმყოფებოდნენ "ნაციონალური მოძრაობის" ლიდერები.

პარტიის ერთ-ერთმა ლიდერმა გიგა ბოკერიამ "რუსთავი2" -ის პირდაპირ ეთერში განაცხადა, რომ საქართველოს მოსახლეობა 2016 წლის საპარლამენტო არჩევნებზე ივანიშვილის ხელისუფლებას გაისტუმრებს.

"ჩვენი მთელი საზოგადოება 7 თვის შემდეგ გადავირჩევთ ივანიშვილის რეჟიმს, საპარლამენტო არჩევნებზე ოქტომბრის და ამ საფრთხეებს წერტილს დავუსვამთ, მაგრამ ამ 7 თვეშიც კი, რაც დარჩენია ივანიშვილის რეჟიმს არჩევნებამდე და მის გადარჩევამდე, ჩვენ უნდა ვიყოთ ყურადღებით. ჩვენ მივაღწიეთ იმას, რომ შევამცირეთ რისკი, როცა ივანიშვილის რეჟიმი გვატყუებდა, რომ გარდაუვალი იყო ჩვენი ხელახალი დამოკიდებულების აღდგენა "გაზპრომზე". ეს რაც მოხდა, ადასტურებს იმას, როგორ ცდილობდნენ ჩვენს ზურგს უკან ამის შეპარებას, როგორ ცდილობდნენ ისევ, რომ ჩვენი ბავშვები გაყინულიყვნენ ზამთარში, ისევ ყოფილიყო მუდმივი წყვეტა და პოლიტიკური შანტაჟი. ეს ყველაფერი თავიდან ავიცილეთ. ამ 7 თვეში უნდა ვიყოთ ყურადღებით და ამ აქციის მთავარი გზავნილი ეს არის, რომ უნდა იცოდნენ, რომ კიდევ თუ დააპირებენ ამის შემოპარებას, ამას უყურადღებოდ არავინ არ დატოვებს, და 7 თვეში, ასეთი საფრთხე, რომ საკუთარი მთავრობა გვყავდეს, რომელიც მუდმივად - ეზოში მარტო ბავშვის გაშვება რომ არ შეიძლება, აი ეგეთი მთავრობა იყოს, რომ ყურადღების გარეშე თუ დატოვე, რაღაც შარში გაგხვევს, აი ამ ყურადღებას არ მოვადუნებთ ამ 7 თვეში და 7 თვის თავზე მთავარ პრობლემას ქვეყნის შიგნით რაც გვაქვს, გადავჭრით," განაცხადა გიგა ბოკერიამ.