აბაშის მუნიციპალიტეტში 4 ახალი საბავშვო ბაღი გაიხსნა. ტყვირში, პირველ მაისში, გაუწყინარსა და სეფიეთში სკოლამდელი დაწესებულებები სამეგრელო-ზემო სვანეთის გუბერნატორმა ლევან შონიამ, აბაშის გამგებელმა მამუკა კვიტაშვილმა და საკრებულოს თავმჯდომარემ პაატა ქურდოვანიძემ საზეიმო ვითარებაში გახსნეს.


ღონისძიებას მშობლები, სოფლის მოსახლეობა ესწრებოდა. მათ გუბერნატორთან და გამგებელთან საუბარში აღნიშნეს, რომ მანამდე შენობების ავარიული მდგომარეობის გამო ბავშვები მეზობელი სოფლების საბავშვო ბაღებში დაჰყავდათ, რაც წლების განმავლობაში სერიოზულ პრობლემებს უქმნიდა მათ.


მოსახლეობამ ახალი, თანამდეროვე სტანდარტების შესაბამისი საბავშვო ბაღების შენობებისა და შესაბამისი ინვენტარით აღჭურვის გამო ადგილობრივ ხელისუფლებას მადლობა გადაუხადა.


როგორც guardian.ge-ს აბაშის მუნიციპალიტეტის გამგეობიდან აცნობეს, ოთხივე ბაღის მშენებლობა რეგიონული განვითარების ფონდიდან და ადგილობრივი ბიუჯეტიდან ჯამში 755 153 ლარით დაფინანსდა. მშენებლობაზე 60-მდე ადგილობრივი მცხოვრები იყო დასაქმებული. ამ ეტაპზე ტყვირის, სეფიეთის, გაუწყინარისა და პირველი მაისი ბაღებში 120 აღსაზრდელი ირიცხება (ბავშვთა მაქსიმალური რაოდენობა კი 200 აღსაზრდელია) და 32 ადამიანია დასაქმებული.


აბაშის გამგეობის პრეს-სამსახურის ინფორმაციით, ბოლო სამი წლის განმავლობაში აბაშაში სულ 7 ახალი საბავშვო ბაღი აშენდა (სოფ. ნორიოში, წყემში, ონტოფოში, ტვირში, სეფიეთში, პირველ მაისსა და გაურყინარში). მშენებლობების გარდა, რეაბილიტაცია ჩაუტარდა ძველ შენობებსაც.


აბაშის მუნიციპალიტეტის გამგებლის მამუკა კვიტაშვილის განცხადებით,  სკოლამდელი აღზრდის სფერო  აბაშის მუნიციპალიტეტში კვლავაც  პრიორიტეტულად ჩება და წელს კიდევ ორი: მაცხოვრისკარისა და გეზათის საბავშვო ბაღებისათვის ახალი  შენობების მშენებლობა იგეგმება.