კონგოს დემოკრატიულ რესპუბლიკაში 11 ტანზანიელ მშვიდობისმყოფელს ბრალს სექსუალურ ექსპლუატაციასა და უკანონო სქესობრივი ურთიერთობების დამყარებაში სდებენ. ჯარისკაცებს ასევე, მათი სავარაუდო მსხვერპლთა მოთხოვნის საფუძველზე, მამობის დადგენის ტესტის გავლაც მოუწევთ. ამის შესახებ ბრიტანული "გარდიანი" გაერთიანებული ერების ორგანიზაციაზე დაყრდნობით წერს.


გაერო-ს გენერალური მდივნის ბან კი მუნის წარმომადგენელმა სტეფან დუჯარიჩმა განაცხადა, რომ ინტერვენციის ძალების ბრიგადის ჯარისკაცები, კონგოს დემოკრატიული რესპუბლიკის აღმოსავლეთით მდებარე სოფელ მავავიში დაპატიმრებული არიან იმ დრომდე, ვიდრე დაწყებული გამოძიება მათ ბრალეულობას დაასაბუთებს.


სხვა საერთაშორისო სამშვიდობო ჯარებისაგან განსხვავებით, ბრიგადას უპრეცედენტო მანდატი გააჩნია სამხედრო ქმედებების საწარმოებლად, რაც აჯანყებული ჯგუფების განეიტრალებას და განიარაღებას გულისხმობს და რაც კონგოს ხანგრძლივი კონფლიქტის მოგვარებაში დახმარების გაწევას ემსახურება.


დუჯარიჩმა განაცხადა, რომ 11 ბრალდებული მშვიდობისმყოფელიდან 4 ახლანდელი მისიის შემადგენლობაში იმყოფება, 7 კი წინა კონტინგენტიდანაა.
 

უკვე თვეებია რაც გაერო, მისი სამშვიდობო ძალებისადმი, განსაკუთრებით კი იმ ნაწილის, რომელიც კონგოსა და ცენტრალური აფრიკის რესპუბლიკაშია ბაზირებული, სექსუალური ძალადობის მხრივ წინასასამართლო განცხადებების კეთების კუთხით ყურადღების ცენტრში იმყოფება. ხუთშაბათს გაერომ განაცხადა,რომ ცენტრალური აფრიკის რესპუბლიკაში 100-სზე მეტი გოგო და ქალი გამოვიდა ბრალდებით, რომ სამშვიდობოების მხრიდან მათზე სექსუალურ ძალადობას, გაუპატიურებას თუ გაუპატიურების მცდელობას ჰქონდა ადგილი.


20 000 სამხედრო პირისაგან შემდგარი სამშვიდობო მისია კონგოში 1999 წელს დაიწყო. კონგოს კონფლიქტი 1994 წელს მეზობელ რუანდაში განხორციელებული გენოციდის გარე ეფექტმა წარმოშვა. ასეულობით ჰუტუსი, რომელიც მასობრივ დახოცვაში მონაწილეობდა, რუანდადან კონგოში გაიქცა და სხვა შეიარაღებულ ჯგუფებთან ერთად ჯერ კიდევ განაგრძობენ ბრძოლებს კონგოს მინერალებით მდიდარ აღმოსავლეთ ნაწილში.