„ასპინძის მუნიციპალიტეტისთვის 2016 წელს პრიორიტეტული გზებთან დაკავშირებული სამუშაოებია“ - აღნიშნული განცხადება ასპინძის მუნიციპალიტეტის გამგებელმა, ლევან ცაბაძემ guardian.ge-სთან საუბრისას გააკეთა.


ცაბაძის თქმით, სწორედ გზის სარეაბილიტაციო სამუშაოებია გათვალისწინებული იმ მსხვილი პროექტებით, რომლებიც მიმდინარე წლის განმავლობაში მუნიციპალიტეტში განხორციელდება.


„წელს ვაგრძელებთ შარშანდელ დაწყებულ პროექტს, ეს არის ორგორა-საყუდაბელი -ძველი-ჭობარეთის გზის რეაბილიტაცია. დაგეგმილია ასევე თავად ასპინძის ტერიტორიაზე რამოდენიმე შიდა გზის მოწესრიგება. ვიწყებთ ასევე ორწლიან გარდამავალ პროექტს, რომლითაც სოფელ ოთაში ასევე ნაქალაქევის გზების აღდგენა მოხდება. მუნიციპალური განვითარების ფონდთან ერთად ხორციელდება ასევე რაგბის ბაზამდე არსებული გზის რეაბილიტაცია, რომლითაც ასევე სარგებლობს სოფელი ივერია.

მოლაპარაკებები გვქონდა სოფლის მეურნეობის სამინისტროს მელიორაციის დეპარტამენტთან, მიღწეული შეთანხმების შედეგად კი ერთ-ერთი უმნიშვნელოვანესი სარწყავი პროექტი ხორციელდება, რომელიც დაახლოებით, 700 ჰექტარს გაასარწყავიანებს.

ვარემონტებთ ასევე კულტურის ცენტრსა და საჭიდაო დარბაზს. ასე, რომ წელს, მნიშვნელოვან წინგადადგმულ ნაბიჯს ველით სოფლის მეურნეობის, კულტურისა და ტურიზმის მიმართულებით. ის, რომ მუნიციპალიტეტში არსებული შიდა გზები იქნება მოწესრიგებული, ძალიან მნიშვნელოვანია, რადგან ასპინძის მუნიციპალიტეტში ძალიან ბევრი კულტურული მემკვიდრეობის ძეგლია, რაც თავისთავად იზიდავს ტურისტებს. თუკი მათ ჩვენ გამართული და მოწესრიგებული ინფრასტრუქტურით დავხვდებით, ეს რა თქმა უნდა გაზრდის მათ რაოდენობასაც და მთლიანად რეგიონის შემოსავალსაც“ - აღნიშნა guardian.ge-სთან საუბრისას ლევან ცაბაძემ და დაამატა, რომ აღნიშნული ინფრასტრუქტურული პროექტების განსახორციელებლად 7 მლნ ლარამდე დაიხარჯება.