თერჯოლის მუნიციპალიტეტში 6 მსხვილი ინფრასტრუქტურული პროექტი ხორციელდება, მათი საერთო ღირებულება 3 მილიონ 300 000 ლარია, - განაცხადა თერჯოლის მუნიციპალიტეტის გამგებელმა, თეიმურაზ ჯაფარიძემ guardian.ge-სთან საუბრისას.


გამგებლის ცნობით, მოხდება ღვანკითი-ტელეფა-რუფოთის, ალისუბანი-სკანდე-მუჯირეთის, ძევრი-ზედა სიმონეთის, თერჯოლა-სიქთარვის, ბარდუბნისა და ჩხარი-გოგნის დამაკავშირებელი გზების რეაბილიტაცია.


„ექვსივე პროექტის სამშენებლო სამუშაოები აქტიურად მიმდინარეობს. დიდი იმედი გვაქვს, რომ ივნისის ბოლოს უკვე ყველა სამუშაო დასრულებული იქნება. გვაქვს ასევე ერთი პროექტი, ეს არის სოფელ ღვანკითის წყალმომარაგების სისტემის რეაბილიტაცია. აღნიშნული პროექტი არის ორწლიანი და ჯამში, 3 მილიონია მისი ღირებულება. მსოფლიო ბანკმა განიხილა და ამ ეტაპზე, 1,5 მილიონი ლარი გამოგვიყო, შესაბამისად, ჩვენ უახლოეს პერიოდში დავიწყებთ სამუშაოებს“ - აღნიშნა თეიმურაზ ჯაფარიძემ და დაამატა, რომ მსხვილი ინფრასტრუქტურული პროექტების გარდა, ადგილობრივი ბიუჯეტის დაფინანსებით, ქალაქ თერჯოლის კეთილმოწყობა იწყება.


„მუნიციპალიტეტის ადგილობრივი ფინანსებით გვინდა რომ ქალაქის კეთილმოწყობაზე ვიზრუნოთ. ჩვენ ვიწყებთ ქუჩებისა და ეზოების მოასფალტებას, განათებების გაკეთებას და ა.შ აქვე გეტყვით, რომ სოფლის მხარდაჭერის პროგრამის ფარგლებშიც ძალიან ბევრი პროექტი გვაქვს, უკვე ყველაფერი შეთანხმებული და დამტკიცებულია და მალე ამ მიმართულებითაც დაიწყება დაგეგმილი პროექტების განხორციელება“ - განაცხადა თერჯოლის მუნიციპალიტეტის გამგებელმა თეიმურაზ ჯაფარიძემ guardian.ge-სთან საუბრისას.