თერჯოლის მუნიციპალიტეტის გამგებლის, თეიმურაზ ჯაფარიძის ცნობით, მუნიციპალიტეტის 6 სოფელში მსხვილი ინფრასტრუქტურული პროექტები ხორციელდება.


როგორც guardian.ge-ს ჯაფარიძემ განუცხადა, მიმდინარე სამუშაოებს რეგიონული განვითარების ფონდი აფინანსებს და ჯამში, 3.5 მლნ ლარი დაიხარჯება.


„წელს მნიშვნელოვანი სამუშაოები გვაქვს ჩასატარებელი. ამჟამად, 6 სოფელში ერთდროულად მიმდინარეობს გზების რეაბილიტაცია. ეს სოფლებია, ტელეფა-ღვანკითი, ალისუბანი-მუჯირეთი, ძევრი-ზედა სიმონეთი, თერჯოლა-სიქთარვა, ბარდუბანი და ჩხარი. აღნიშნულ საგზაო მონაკვეთებზე სამუშაოები ივნისის ბოლოს დასრულდება“ - განაცხადა თეიმურაზ ჯაფარიძემ და დაამატა, რომ საგზაო ინფრასტრუქტურის მოწესრიგების გარდა, მუნიციპალიტეტში წელს უმნიშვნელოვანესი პროექტის განხორციელება იგეგმება.


„ვმუშაობთ სოფელ ღვანკითის წყალმომარაგების პრობლემის აღმოფხვრაზე, ეს არის ძალიან მნიშვნელოვანი ორწლიანი პროექტი, რომელზეც მსოფლიო ბანკი, დაახლოებით, 3.5 მლნ ლარს დახარჯავს“ - აღნიშნა თერჯოლის მუნიციპალიტეტის გამგებელმა.


ჯაფარიძის თქმით, მას შემდეგ რაც ლატვიის რესპუბლიკის რუჟიენის მუნიციპალიტეტსა და თერჯოლას შორის, ორმხრივი თანამშრომლობის მემორანდუმი გაფორმდა, საინტერესო ღონისძიებები დაიგეგმა როგორც კულტურის, ტურიზმის, ისე სოფლის მეურნეობისა და ჯანდაცვის სფეროში. მისივე ინფორმაციით, წელსვე თერჯოლის მუნიციპალიტეტის დელეგაცია, შემდგომი ურთიერთობის გაღრმავების მიზნით, ლატვიაში რუჟიენის მუნიციპალიტეტს ესტუმრება.