"ეკონომიკა ძალიან ცუდ მდგომარეობაშია. ის 6–ჯერ და უფრო მეტად ჩამორჩება განვითარებული ეკონომიკის მქონე ქვეყნებს," განაცხადა ბიძინა ივანიშვილმა ტექნო პარკში ქართული ტელევიზიების ჟურნალისტებთან შეხვედრაზე. თუმცა, როგორც მან აღნიშნა, 3–4 წელიწადში ქართულ ეკონომიკაში მაქსიმუმი გაკეთდა.

„ეკონომიკა ძალიან ცუდ მდგომარეობაშია. ის 6–ჯერ და უფრო მეტად ჩამორჩება განვითარებული ეკონომიკის მქონე ქვეყნებს. შესაბამისად, პრობლემა და ცდუნება დიდია იმისა, რომ ყველაფერი ეს ხელისუფლებას დავაბრალოთ, რომ მან ვერ შეძლო 3–4 წელიწადში და პრინციპულად ვერ მოახერხა გადაეტეხა ეს პრობლემა, რაც თეორიულად შეუძლებელია. ის, რისი გაკეთებაც შეიძლებოდა 3–4 წელიწადში, მაქსიმუმი გაკეთდა და დანარჩენს მე კარგად აღვწერ ჩემს წერილში, რომ სჭირდება დაახლოებით 10–15 წელიწადი და თუ ჩვენ მოვახერხებთ, ვიქნებით სტაბილურები და ყველა იმ ღირებულებეს დავიცავთ და სწორი გზით წავალთ, ჩვენ შეგვიძლია რეალურად უმოკლეს დროში მოვახერხოთ და ჩავდგეთ განვითარებული ქვეყნების რიგში,“ განაცხადა ბიძინა ივანიშვილმა.

მან საერთაშორისო ორგანიზაცეიების რეიტინგზეც შეაჩერა ყურადღება და თქვა, რომ ეს ბევრის მთქმელია. ივანიშვილმა მაგალითისთვის მსოფლიო ბანკის რეიტინგი დაასახელა და თქვა, რომ ამ ორგანიზაციის შეფასებით, მთავრობის ეფექტიანობის, გამჭვირვალობის და კორუფციასთან ბრძოლის მხრივ საქართველოს მნიშვნელოვნად აქვს მაჩვენებლები გაუმჯობესებული.

ივანიშვილმა ასევე საერთაშორისო სავალუტო ფონდის მიერ გაკეთებული პროგნოზიც ახსენა და თქვა, რომ ფონდის გათვლებით, 2021 წლისთვის საქართველოს ეკონომიკური ზრდა 12%–მდე იქნება, რაც ყოფილი პრემიერ მინისტრის აზრით, "აბსოლუტურად რეალურია" და შეიძლება, რომ ეს მაჩვენებელი უფრო "შთამბეჭდავიც იყოს" და 2030 წლისთვის საქართველოს გამართული ეკონომიკა ექნება.