ტელეკომპანია „რუსთავი 2“-ის გენერალური დირექტორის, ნიკა გვარამიას განცხადებით, ტელეკომპანია გააგრძელებს მუშაობას ისე როგორც სასამართლო პროცესის დაწყებამდე მუშაობდა.

ამის შესახებ ნიკა გვარამიამ სპეციალურად გამართულ ბრიფინგზე განაცხადა და აღნიშნა, რომ „რუსთავი 2“ აქტიურად გააშუქებს წინასაარჩევნო კამპანიის ფარგლებში მთავრობის მოღვაწეობას.

„რას ვგეგმავთ?! ვგეგმავთ მუშაობას ისე როგორც ვმუშაობდით. ნამდვილად  არ გადავყვებით ამ გადაწყვეტილებას, მით უმეტეს, რომ ეს ასე მოსალოდნელი იყო ჩვენთვის. ორშაბათიდან ჩვენ დავიწყებთ მოვლენების გაშუქებას ზუსტად იგივე რიტმში სანამ ეს სასამართლო დაიწყებოდა.  ჩვენ დავიწყებთ სრულფასოვნად წინასაარჩვენო კამპანიის და მთავრობის მოღვაწეობის და არა მხოლოდ მთავრობის, გაშუქებას. ნაკლებს ვილაპარაკებთ ამ საქმეზე თუ რა თქმა უნდა, რაიმე ახალი დეტალები არ გამოიკვეთა“,-განაცხადა გვარამიამ.

მისი თქმითვე, ტელეკომპანიაში იმედოვნებენ, რომ უზენაესი სასმართლო ღირსეულად გაუმკლავდება ამ მნიშვნელოვან გამოწვევას.

„ასე ვიმუშავებთ ბოლომდე, მათ შორის არჩევნებზეც. ჩვენ გვაქვს ჩვენი გეგმები. ეს გეგმები მხოლოდ სამართლებრივი ხასიათისაა. ჩვენ ველოდებით საკონსტიტუციო სასამართლოს გადაწყვეტილებას, რაც შეიძლება ძალიან მნიშვნელოვანი გარემოება აღმოჩნდეს ჩვენს საქმეზე. ვწერთ საკასაციო საჩივარს და იმედი გვაქვს, რომ უზენაესი სასამართლო ღირსეულად გაუმკლავდება ამ ძალიან მნიშვნელოვან გამოწვევას, გამოწვევას არა მარტო მათ წინაშე, არამედ მთელი ქვეყნის წინაშე დამდგარ გამოწვევას. „რუსთავი 2“ უბრუნდება ჩვეულ კალაპოტს“,-განაცხადა ნიკა გვარამიამ.