„ვარძელაშვილი-კოპალეიშვილი-ერემაძის ტრიო ბატონი გვარამიას პოლიტიკური ოჯახის წევრები არიან“ - ამის შესახებ საქართველოს იუსტიციის მინისტრმა, თეა წულუკიანმა მთავრობის სხდომის დასრულების შემდეგ ჟურნალისტებს შემდეგ, ტელეკომპანია რუსთავი 2-ის საქმეზე საუბრისას განუცხადა.

იუსტიციის მინისტრის განმარტებით,  საკონსტიტუციო სასამართლო საქმეების განხილვასთან დაკავშირებით რიგითობის პრინციპს არღვევს.

მისი თქმით, უმეტეს შემთხვევაში საკონსტიტუციო სასამართლოში საქმეების განხილვა ჭიანურდება, მაშინ როდესაც „რუსთავი 2“-ის დავებს 6-7 დღეში იხილავს სასამართლო.

"რიგითობის პრინციპი ირღვევა ჩემი გადასახედიდან, რადგან თუ ავიღებთ მაგალითად „რუსთავი 2“-ის შვიდ საკონსტიტუციო სარჩელს, შვიდივე განიხილა პირველმა კოლეგიამ და არ არის პასუხი იმაზე, რატომ უნდა განეხილა პირველ კოლეგიას. ეს გახლავთ ვარძელაშვილი-კოპალეიშვილი-ერემაძის ტრიო. ეს ის ხალხია, რომელიც არიან ბატონი გვარამიას პოლიტიკური ოჯახის წევრები. ასევე მაქვს კითხვები ვადებთან დაკავშირებით, როდესაც რიგითი მოქალაქეები ჩივიან, რომ 2013, 2014, 2015 წლიდან ელოდებიან საქმეების განხილვას, „რუსთავი 2“-ის დავებს კი 6-7 დღეში იხილავს საკონსტიტუციო სასამართლო, იგივე პირველი კოლეგია. როდესაც მაგალითად, ავტორი არის ამა თუ იმ საქმის ბატონი უგულავა, მაშინ ხდება საქმის არსებითად განხილვა სამ თვეში, ოთხ თვეში მაქსიმუმ. ჩვენ გვქონდა შემთხვევა, როდესაც საკონსტიტუციო სასამართლომ ერთ დღეში გადაწყვიტა საკითხი ე.წ. კაბელების საქმეზე“, - განაცხადა თეა წულუკიანმა.