ყოფილი პრემიერის, ბიძინა ივანიშვილის განცხადებით, ევროპის ადამიანის უფლებათა სასამართლო ყოფილ შინაგან საქმეთა მინისტრს, ვანო მერაბიშვილს პოლიტპატიმარს არ უწოდებს.

ამის შესახებ ივანიშვილმა ბეჭდური და ონლაინ-მედიის წარმომადგენლებთან შეხვედრის დასრულების შემდეგ ჟურნალისტებთან საუბრისას განაცხადა.

მისი თქმით, ტელეკომპანია „რუსთავი 2“-ს უნდა, რომ ვანო მერაბიშვილს პოლიტპატიმარი უწოდონ.

„არ გავცნობივარ ჯერ და ვერ გავაკეთებ შესაბამის რეაქციას,  მგონი იქაც დამახინჯებულად თქვეს და თქვენც ასე იმეორებთ. არ უწოდებენ, „რუსთავი 2“-ს კი უნდა, რომ ასე უწოდონ, მაგრამ ასე არ უწოდებენ. გავეცნობი და უფრო მოგვიანებით გავაკეთებ რეაქციას“, - განაცხადა ივანიშვილმა.  

ევროპის ადამიანის უფლებათა სასამართლომ დღეს საქართველოს ყოფილი პრემიერის, ვანო მერაბიშვილის საქმეზე გადაწყვეტილება სასამართლოს ვებ-გვერდზე გამოაქვეყნა. როგორც მერაბიშვილის ადვოკატმა ოთარ კახიძემ განაცხადა, სტრასბურგის სასამართლომ დაადგინა, რომ ვანო მერაბიშვილს დაუსაბუთებლად შეეფარდა პატიმრობა. მისი თქმით, პრაქტიკულად, პოლიტიკური კონტექსტის გათვალისწინებით, სასამართლოს გადაწყვეტილებიდან იკითხება, რომ ვანო მერაბიშვილი პოლიტიკური პატიმარია.

იუსტიციის მინისტრმა, თეა წულუკიანმა კი აღნიშნა, რომ ადამიანის უფლებათა ევროპულმა სასამართლომ შავით თეთრზე თქვა, რომ ყოფილი შს მინისტრის, ვანო მერაბიშვილის წინასწარი პატიმრობა, რომელიც  2013 წლის მაისში დაიწყო და  2014 წლის თებერვალში დასრულდა, არის კანონიერი. მისი ცნობით, სტრასბურგის სასამართლოს გადაწყვეტილება არ იწვევს რაიმე ფორმით ყოფილი შინაგან საქმეთა მერაბიშვილის ციხეში ყოფის საკითხის გადასინჯვას.