არასამთავრობო ორგანიზაცია “პოზიცია”-ს ორგანიზებით, საქართველოს სხვადასხვა უმაღლესი სასწავლებლების სტუდენტებისთვის ფოთის თავისუფალი ინდუსტრიული ზონის დირექტორმა, დეივიდ ბარკერმა ტრენინგი ჩაატარა.

ბარკერი სტუდენტებს დროის მენეჯმენტსა და გუნდური მუშაობის მნიშვნელოვან ასპექტებზე ესაუბრა. ტრენინგი ერთი საათის განმავლობაში, კითხვა-პასუხის რეჟიმში მიმდინარეობდა.

„პოზიცია“-ს ხელმძღვანელმა, გურამ ადამაშვილმა სტუდენტებს არასამთავრობო ორგანიზაციის შესახებ ინფორმაცია მიაწოდა, ასევე გააცნო ის ხედვები, მიზნები და სამომავლო გეგმები, რომლებიც ორგანიზაციას გააჩნია. ტრენინგში მონაწილე სტუდენტები „პოზიცია“-ს საქმიანობითა და პროექტებით დაინტერესდნენ და შემდგომი თანამშრომლობის სურვილიც გამოთქვეს.

„მსგავსი ტიპის ღონისძიებები და აქტივობები მიზნად ისახავს საზოგადოების ცნობიერების ამაღლებას და მნიშვნელოვანია სხვადასხვა ჯგუფების სოციალურ გარემოში უკეთ ინტეგრაციისთვის. „პოზიცია“ გეგმავს გააგრძელოს სხვადასხვა პროექტის ფარგლებში სტუდენტებთან შეხვედრები და ხელი შეუწყოს მათი ინფორმირებულობის დონისა და ცნობიერების ამაღლებას“ – აცხადებენ ორგანიზაციაში.