ევროკომისიის ხელმძღვანელმა ჟან–კლოდ იუნკერმა დიდ ბრიტანეთს დაჟინებით მოუწოდა, რაც შეიძლება მალე "შეიტანოს ნათელი მის პოზიციაში" "Brexit"– თან დაკავშირებით.

მან ვევროპის პარლამენტს უთხრა, რომ ბრიტანეთი და ევროკავშირი მეგობრებად რჩებიან, მაგრამ დიდმა ბრიტანეთმა უნდა დააფიქსიროს თავისი მკაფიო პოზიცია იმისათვის, რომ თავიდან იყოს აცილებული გაურკვევლობა.

დევიდ ქამერონი სამშაბათს, მოგვიანებით, პირველად შეხვდება ევროკავშირის ლიდერებს მას შემდეგ, რაც დიდმა ბრიტანეთმა ხმა მისცა ბლოკის დატოვებას.

დიდი ბრიტანეთის პრემიერ მინისტრი შეხვედრისას "Brexit" –ის შედეგებს განიხილავს და ბრიუსელში დაგეგმილი ევროკავშირის სამიტის წინ გარკვეულ საკითხებს შეაჯერებს.

პარლამენტში გამოსვლისას გუშინ დევიდ ქამერონმა დაადასტურა, რომ დიდი ბრიტანეთი არ არის მზად დაიწყოს ევროკავშირიდან ფორმალური გამოსვლის პროცესი. მისი თქმით, ეს ოქტომბრის შემდეგ, მისმა შემცვლელმა უნდა გააკეთოს.

ბერლინში გერმანიის კანცლერი ანგელა მერკელი კი გუშინ დღის მე–2 ნახევარში საფრანგეთის პრეზიდენტს ფრანსუა ოლანდს და იტალიის პრემიერ მინისტრს მათეო რენზის მასპინძლობდა. ლიდერებმა ევროკავშირის გასაძლიერებლად "ახალი იმპულსის" ამოქმედების მოწოდება გააკეთეს.

სამივე ლიდერმა გამოხატა სინანული ბრიტანეთის მიერ ევროკავშირის დატოვებისთვის ხმის მიცემის გამო. მერკელმა კი ამას „ძალიან მტკივნეული და დასანანი გადაწყვეტილება“ უწოდა.

„ჩვენ ვთანხმდებით, რომ ევროპული ხელშეკრულებების 50-ე არტიკლი ძალიან ნათელია - წევრმა სახელმწიფომ, რომელსაც სურს ევროკავშირის დატოვება, უნდა ამცნოს ევროპულ საბჭოს,“ განაცხადა ანგელა მერკელმა ერთობლივ პრეს კონფერენციაზე ბერლინში მის კანცელარიაში.

„არ იქნება რაიმე შემდგომი ნაბიჯები, სანამ ეს მოხდება. მხოლოდ ამის შემდეგ გამოსცემს ევროპული საბჭო სახელმძღვანელოებს, რომლის მიხედვითაც იქნება გასვლა განხილული.

„ეს ნიშნავს რომ, და ჩვენ შევთანხმდით ამ საკითხზე, არ იქნება არც არაფორმალური და არც ფორმალური მოლაპარაკებები ბრიტანეთის გასვლაზე მანამ, სანამ ევროპული საბჭო არ მიიღებს [დიდი ბრიტანეთის] თხოვნას ევროკავშირიდან გასვლასთან დაკავშირებით," აღნიშნა მერკელმა.