პარტია "თავისუფალ დემოკრატებს"კიდევ ერთი ახალი წევრი ჰყავს. პარტიის რიგებს დევი ტაბიძე შეუერთდა. ტაბიძე საზოგადოებას "თავისუფალი დემოკრატების" ლიდერმა, ირაკლი ალასანიამ წარუდგინა და მას ‘’თავისუფალი დემოკრატების’’ მანდატი გადასცა.

‘’ჩვენს რიგებს შემოემატა მედიცინის აკადემიური დოქტორი ბატონი დევი ტაბიძე. ის არის საკმაოდ კვალიფიციური და თავის საქმის პროფესიონალი. დევი ტაბიძემ განვლო საინტერესო და მნიშვნელოვანი გზა რიგითი კლინიკური ორდინატორიდან მედიცინის დოქტორამდე. მათ შორის 16 წელი აღმასრულებელ სექტორში და 12 წელი კლინიკურ მედიცინაში . ბატონი დევი არის ცნობილი ექიმების ოჯახში აღზრდილი მეოთხე თაობის ექიმი, რომელიც დღესაც ზრდის მომავალ თაობებს. დღეს მან სურვილი გამოთქვა დადგეს ‘’თავისუფალი დემოკრატების’’ გვერდში და ჩვენთან ერთად იზრუნოს ახალი, თანამედროვე, დემოკრატიული სახელმწიფოს მშენებლობაში, რომლის ერთ-ერთი ძირითადი ნაწილია სოციალური და ჯანდაცვის სფერო. ამ სფეროებში პრობლემები, კი სამწუხაროდ მრავლად არის ჩვენს ქვეყანაში. ჩვენ ბატონ დევისთან, დავით თელიასთან, კოკა ფრუიძესთან და ‘’თავისუფალი დემოკრატების’’ ძლიერ გუნდთან ერთად ვუმუშავებთ უკეთესი ჯანდაცვის სისტემის შესაქმნელად’’, - განაცხადა ირაკლი ალასანიამ.

დევი ტაბიძე გახლავთ მედიცინის აკადემიური დოქტორი, ექიმი გინეკოლოგ-რეპროდუქტოლოგი, ჯანდაცვის ორგანიზატორი- მენეჯერი, დამოუკიდებელი ექსპერტი ჯანდაცვისა და სოციალურ საკითხებში. მას აქვს 21 საერთაშორისო სერთიფიკატი ჯანდაცვისა და სოციალურ საკითხებში. დევი ტაბიძე თბილისის სამ წამყვან უნივერსიტეტში არის მოწვეული პროფესორის სტატუსით.