აწგარდაცვლილი 22 წლის დემურ სტურუას ოჯახის წევრები აცხადებენ, რომ გამოძიება კიდევ ერთი სამართალდამცველის ვინაობას მალავს.

დემურ სტურუას ახლობლების ინფორმაციით, უბნის ინსპექტორი, რომელმაც ახალგაზრდა სავარაუდოდ თვითმკვლელობამდე მიიყვანა, საბედისწერო ღამეს მარტო არ იმყოფებოდა.

„ღამის ორ საათზე მოსულა 2 პოლიციელი და შეამოწმეს ცოცხალი იყო თუ მკვდარი. ნანახი ჰყავდათ ხეზე ჩამოკიდებული, გაიარეს და წავიდნენ. არ ვეთანხმები მაგათ ექსპერტს, 7-ში აქვს თავი ჩამოკიდებული და 8-ში არის გატარებული ექსპერტიზა“,-აცხადებს დემურ სტურუას დედა, ნონა ჯოჯუა.

ტელეკომპანია „რუსთავი 2“-ის ცნობით, პარალელურად, უკვე ცნობილია ალეტერნატიული ექსპერტიზის პირველადი მონაცემები, რომლითაც დასტურდება, რომ ცხედარს დაზიანებები ჰქონდა. საბოლოო დასკვნა მოგვიანებით გახდება ცნობილი.

როგორც მთავარი პროკურატურის განცხადებაშია აღნიშნული, მიმდინარე წლის  8 აგვისტოს, შ.ს.ს. სამტრედიის რაიონულ სამმართველოში დაიწყო გამოძიება სისხლის სამართლის საქმეზე, დემურ სტურუას თვითმკვლელობამდე მიყვანის ფაქტზე, საქართველოს სისხლის სამართლის კოდექსის 115-ე მუხლით.

„გამოძიების ფარგლებში, ჩატარდა პირველადი გადაუდებელი საგამოძიებო მოქმედებები, მოხდა შემთხვევის ადგილის დათვალიერება, დაინიშნა სასამართლო-სამედიცინო ექსპერტიზა.

მას შემდეგ, რაც ცნობილი გახდა, რომ დემურ სტურუა თვითმკვლელობამდე დაწერილ წერილში თვითმკვლელობის მიზეზად უბნის ინსპექტორ-გამომძიებლის მხრიდან განხორციელებულ ზეწოლას ასახელებს, საქმე გამოსაძიებლად გადაეცა დასავლეთ საქართველოს საოლქო პროკურატურის საგამოძიებო ნაწილს“,-ნათქვამია განცხადებაში.

რაც შეეხება თვითმკვლელობამდე დემურ სტურუას მიერ დაწერილ წერილში ნახსენებ პოლიციელს, მან პოსტი დატოვა.