„დემოკრატიული მოძრაობის“ ლიდერის, ნინო ბურჯანაძის შეფასებით, დღეს, საქართველოს NATO-ში გაწევრიანება აღარ აწყობს.

მისი თქმით, 2008 წლის შემდეგ ქვეყანაში ვითარება რადიკალურადაა შეცვლილი და NATO-ში გაწევრიანება ნიშნავს ქვეყნის ტერიტორიულ მთლიანობაზე უარის თქმას.

„თუ საუბარია, ადამიანის უფლებებზე, პროგრესზე, ევროპულ ფასეულობებზე, რა თქმა უნდა, ყველაფერი კარგი უნდა ავიღოთ, მაგრამ თუ საუბარია NATO-ზე, საქართველოს ადგილი NATO-ში არ არის და ეს ჩვენ გვითხრეს NATO-ს უმაღლესი თანამდებობის პირებმა. დღეს საქართველოს აღარ აწყობს NATO-ში გაწევრიანება იმ მარტივი მიზეზის გამო, რომ 2008 წლის შემდეგ, ქვეყანაში ვითარება რადიკალურად არის შეცვლილი და NATO-ში გაწევრიანება ნიშნავს ქვეყნის ტერიტორიულ მთლიანობაზე უარის თქმას. იყო განცხადებები, რომ თითქოს უბლოკო სტატუსის გამოცხადება არის ქვეყნის ოკუპაციის დაკანონება. იმის მცდელობა, რომ საქართველომ ბლოკებზე უარი გამოაცხადოს და დაიწყოს მოლაპარაკება რუსული ჯარის საქართველოს ტერიტორიიდან გაყვანზე, თუ რეალურად, ის არის ოკუპაციის დაკანონება, როდესაც შენ იმ განცხადებებით, რომ ხვალ NATO-ში უნდა გაწევრიანდე, ამით სამუდამოდ ტოვებ რუსულ ჯარს ქვეყანაში",- განაცხადა ბურჯანაძემ.

ნინო ბურჯანაძე ასევე, პარლამენტის თავმჯდომარის დავით უსუფაშვილის ინიციატივასაც აფასებს და აცხადებს, რომ დავით უსუფაშვილმა კარგად შეაფასა უბლოკო სტატუსის მნიშვნელობა.

„ბუნებრივია, მას სრული უფლება ჰქონდა ამის კონტრინიციატივა წარმოედგინა, თუმცა, მე ამას კონტრინიციატივად ვერ ვხდევა. ბატონი დავითი საკმაოდ მაღალი დონის პოლიტიკოსი და იურისტია, თუმცა. მის მიერ ჩამოყალიბებულ ფორმულირებაში, სადაც ის არ საუბრობს NATO-ზე, არამედ ის საუბრობს ევროატლანტიკურ სივრცეზე. მე ვერ ვხედავ აქ განსაკუთრებულ წინააღმდეგობას. მისი წინადადება იყო, რომ დაიმკვიდროს საქართველომ თავისი ადგილი ევროატლანტიკურ სივრცეში",-აღნიშნა ბურჯანაძემ.