ცენტრალურ საარჩევნო კომისიას (ცესკო) 8 ოქტომბრის საპარლამენტო არჩევნების შედეგების შეჯამება კენჭისყრის ჩატარებიდან არაუგვიანეს მე-19 დღეს, 27 ოქტომბრისთვის მოუწევს.

„საარჩევნო კოდექსის“ მიხედვით, თუ არჩევნების მეორე ტური არ დაინიშნა, ცესკო პარლამენტის არჩევნების საბოლოო შედეგების შემაჯამებელ ოქმს დაადგენს, ხოლო თუკი არჩევნების მეორე ტური დაინიშნება, ცესკო პარლამენტის არჩევნების საბოლოო შედეგების შემაჯამებელ ოქმს მეორე ტურის დღიდან არაუგვიანეს მე-19 დღისა გამოსცემს. ეს დღე უკვე 21 ნოემბერია.

მაჟორიტარულ საარჩევნო ოლქში არჩეულად პარლამენტის წევრობის ის კანდიდატი ჩაითვლება, რომელიც არჩევნებში მონაწილეთა ხმების ნახევარზე მეტს (ბარიერი 50%) მიიღებს. პარლამენტის წევრთა მანდატები მიეკუთვნება მხოლოდ იმ პარტიას, რომელმაც არჩევნებში ხმების არანაკლებ 5%-ს მიიღებს.

პარლამენტის მაჟორიტარული არჩევნების მეორე ტურის დანიშვნის შემთხვევაში, მისი გამართვის ბოლო ვადა 2 ნოემბერია.

პარლამენტის მაჟორიტარული არჩევნები 50%-იანი ბარიერის პირობებში ტარდება და მეორე ტური მაშინ ინიშნება, თუკი დეპუტატობის კანდიდატი ამომრჩეველთა ხმების ნახევარზე მეტს ვერ მიიღებს.

მაჟორიტარული არჩევნების მეორე ტურში ორი კანდიდატი მონაწილეობს, რომლებმაც პირველ ტურში სხვებზე მეტი ხმა მიიღეს. იმ შემთხვევაში, თუ 2-ზე მეტ კანდიდატს ერთნაირი საუკეთესო შედეგი აღმოაჩნდა ან ერთი საუკეთესო შედეგის მქონე კანდიდატის მომდევნო რამდენიმე კანდიდატმა ერთნაირი რაოდენობის ხმები მიიღო, მეორე ტურში ყველა ზემოაღნიშნული კანდიდატი იღებს მონაწილეობას.

არჩევნების მეორე ტურში არჩეულად დეპუტატობის ის კანდიდატი ჩაითვლება, რომელიც მეტ ხმას მიიღებს. თუკი კანდიდატებმა ხმათა ერთნაირი რაოდენობა მიიღეს, არჩეულად ის კანდიდატი ჩაითვლება, რომელმაც პირველ ტურში ხმათა მეტი რაოდენობა მიიღო. თუ ხმათა ეს რაოდენობებიც ტოლი აღმოჩნდა, ხელახალი არჩევნები იმართება.