„ერთიანი ნაციონალური მოძრაობის“ ერთ-ერთ წევრის, გიორგი ტუღუშის განცხადებით, „ქართული ოცნება-დემოკრატიული საქართველოს“ აქტივისტებმა მარნეულის 48-ე საარჩევნო ოლქი დაარბიეს.

ამის შესახებ ტუღუშმა დღეს გამართულ ბრიფინგზე განაცხადა.

მისი თქმით, „ქართული ოცნების“ აქტივისტები ისროდნენ ქვებს, იყენებდნენ ხელკეტებს. ასევე, „ნაცმოძრაობის“ ინფორმაციით, გატაცებულია საარჩევნო ყუთი, რომელიც უკან არ დაბრუნებულა.

„მარნეულის 48-ე საარჩევნო ოლქში „ქართული ოცნების“ აქტივისტებმა დაარბიეს საარჩევნო უბანი, ისროდნენ ქვებს, იყენებდნენ ხელკეტებს, ასევე, ჩვენი ინფორმაციით, გატაცებულია საარჩევნო ყუთი, რომელიც უბნიდან წაიღეს და იგი უბანზე, რამდენადაც ვიცით, არ დაბრუნებულა. პოლიციამ სამწუხაროდ ამ დარბევის პრევენცია ვერ მოახერხა. იყო საკმაოდ არაეფექტური. ჩვენ თავიდან გვქონდა ინფორმაცია, რომ პოლიციის ნაწილმა დატოვა კიდეც უბანი, ვინაიდან ვერ უმკლავდებოდა ამ თავდამსხმელებს“,-თქვა მან.

გიორგი ტუღუშმა ასევე აღნიშნა, რომ  „ქართული ოცნება“ აგებს არჩევნებს და ეს ინციდენტიც ამით არის გამოწვეული.

„აი, ეს ისტერია და ძალადობა, რომელიც ჩვენი თვალით ვიხილეთ მარნეულის ერთ-ერთ უბანზე, გამოწვეულია სწორედ იმით, რომ ისინი გრძნობენ და ალბათ, იციან, რომ აგებენ არჩევნებს. ამ ყველაფერს, რამდენადაც ჩვენ ვიცით, წინ უძღოდა „ქართული ოცნების“ კანდიდატის, ბატონი ნავერიანის ვიზიტები, როგორც ამ უბანზე, ასევე, ჯანდარის ერთ-ერთ უბანზე, სადაც იგი ემუქრებოდა გარეთ შეკრებილ ხალხს და ემუქრებოდა, რომ საერთოდ დაკეტავდა ამა თუ იმ უბანს და არ მისცემდა ამომრჩევლებს საშუალებას, საკუთარი ნება გამოეხატათ. ჩვენ გვაქვს ძალიან მძიმე ვითარება. თავიდან, როდესაც დარბევა დაიწყო, მედიასაშუალებების წარმომადგენლები, დამკვირვებლები, კომისიის წევრები მომწყვდეული იყვნენ შენობაში, რომელსაც  ესროდნენ ლოდებს, ისროდნენ სხვადასხვა ნივთებს, საგნებს, მათ შორის ქვებს და ვერ ტოვებდნენ შენობას“,-განაცხადა მან.

გიორგი ტუღუშმა თქვა, რომ ის ამ თემაზე შინაგან საქმეთა სამინისტროს წარმომადგენელს ესაუბრა და მან აღუთქვა, რომ პოლიცია ყველანაირად ეცდება, რომ არჩევნები ნორმალურ პირობებს დაუბრუნდეს.

„მე მქონდა საუბარი შსს-ს წარმომადგენელთან და მან აღმითქვა, რომ მობილიზებულ იქნება პოლიციის დამატებითი ძალები და ყველანაირად შეეცდებიან, რომ მოხდეს დეესკალაცია და საარჩევნო პროცესი დაუბრუნდეს ნორმალურ ფარგლებს. მესმის, რომ არჩევნების წაგების ეშინიათ, მაგრამ ეს იმას ნამდვილად არ ნიშნავს, რომ მსგავს ინციდენტებს უნდა ჰქონდეს ადგილი. ახლოვდება უბნების დახურვის დრო, დაიწყება ხმების დათვლა და ხელისუფლებამ ყველა ზომა უნდა მიიღოს და ყველა ზომა გაატაროს, რომ თავიდან ავიცილოთ მსგავსი ძალადობრივი ინციდენტები „ქართული ოცნების“ მხარდაჭერების მხრიდან. იმედს ვიტოვებ, რომ ყველაფერი მშვიდ გარემოში ჩაივლის, ასევე მოძალადეები, რომლებიც დაარბიეს უბანი, სათანადო პასუხს აგებენ კანონის წინაშე“,-განაცხადა ტუღუშმა.

მარნეულის 48–ე საარჩევნო უბანთან მომხდარ დაპირისპირებას გამოეხმაურა „ქართული ოცნების“ აღმასრულებელი მდივანი ირაკლი კობახიძე, რომელიც პროვოკაციის მოწყობაში „ნაციონალური მოძრაობის“ მაჟორიტარი დეპუტატობის კანდიდატის, ახმედ იმამყულიევის მხარდამჭერებს ადანაშაულებს.

კობახიძე მოუწოდებს სამართალდამცველებს, დაარეგულირონ სიტუაცია.

„ფიზიკურად დაუპირისპირდნენ „ნაცმოძრაობის“ წარმომადგენლები, როგორც ჩვენს აქტივისტებს, ისე სამართალდამცავი ორგანოების წარმომადგენლებს. ჩვენ ვაფრთხილებთ ძალიან მკაცრად ყველა იმ ადამიანს, რომელიც ამ ყველაფერს აკეთებს, რომელიც ცდილობს, რომ ხელოვნურად შეიტანოს არეულობა საარჩევნო პროცესში, ჩრდილი მიაყენოს საარჩევნო პროცესს, რომ არ გაბედონ ასეთი რამის გაკეთება. ჩვენ უზრუნველვყოფთ იმას, რომ თვალს მივადევნებთ ბოლომდე ამ პროცესს, რომ სათანადოდ დაისაჯოს ყველა ის ადამიანი, რომელიც ცდილობს კიდევ ერთხელ საარჩევნო პროცესებისთვის ჩრდილის მიყენებას და სამართალდარღვევის ჩადენას, ძალიან მკაცრად დაისჯებიან ისინი. ვთხოვ ჩვენ სამართალდამცავ ორგანოებს რომ ჩაერიონ ამ პროცესებში და უზრუნველყონ სიტუაციის განმუხტვა“, – განაცხადა საგანგებო ბრიფინგზე ირაკლი კობახიძემ.