საქართველოს პარლამენტის ყოფილი თავმჯდომარე დავით უსუფაშვილი „რუსთავი 2"-ის ირგვლივ განვითარებულ მოვლენებსა და ტელეკომპანიის საქმეზე სტრასბურგის სასამართლოს მიერ უზენაესი სასამართლოს გადაწყვეტილების აღსრულების შეჩერების ფაქტს ეხმაურება.

უსუფაშვილი აცხადებს, რომ „ამ საკითხთან დაკავშირებით ყველასთვის ყველაფერი ნათელი გახდა. ევროპისთვისაც ნათელი გახდა, რომ საკუთრებასთან დაკავშირებით „რუსთავი 2”-თან მიმართებაში ყველაფერი წესრიგში არ არის".

პარლამენტის ყოფილი თავმჯდომარე ხელისუფლების წარმომადგენელთა მიერ სამაუწყებლო კომპანიასა და სტრასბურგის სასამართლოს გადაწყვეტილების აღსრულებასთან დაკავშირებით გაკეთებულ განცხადებებსაც გამოეხმაურა და თქვა, რომ თემა „ფეთქებადსაშიში" გახდა.

„თუ ვინმე ხელისუფლებაში იფიქრებს სტრასბურგის გადაწყვეტილების შემოვლითი გზით იგნორირებას, ეს იქნება კიდევ უფრო დიდი პრობლემების დასაწყისი და ზოგადად, მე თქვენი სახანძრო უსაფრთხოების სამსახურს ვურჩევდი იყოს განსაკუთრებით ყურადღებით, რადგან გვახსოვს ქიბარ ხალვაშთან დაკავშირებულ ქონებრივ დავებთან მის ქონებას თუ სხვის მიერ მისთვის წართმეულ ქონებას თვითაალების მიდრეკილება აქვს ხოლმე. ამიტომ, მე მინდა დაზღვეული ვიყოთ რაიმე სერიოზული გართულებებისგან. ეს იქნება მთავრობის უგუნურობა თუ რაღაც ამ ტიპის მოვლენები," - მიმართა დავით უსუფაშვილმა „რუსთავი 2"-ის ჟურნალისტს.