ორი ზრდასრული ადამიანი და ერთი ბავშვია მოკლული კალიფორნიაში, სან ბერნარდინოს დაწყებითი სკოლის საკლასო ოთახში მომხდარი სროლების შედეგად.

BBC პოლიციაზე დაყრდნობით წერს, რომ ეჭვმიტანილმა ცეცხლსასროლი იარაღით მოკლა მისი დაცილებული მეუღლე, მასწავლებელი და დაჭრა მის უკან მყოფი ორი ბავშვი, რომელთაგან ერთ-ერთი გარდაიცვალა. მამაკაცმა შემდეგ რევოლვერი საკუთარი თავისკენ მიმართა და ერთი გასროლით, თავი მოიკლა.

სროლები ადგილობრივი დროით 10:30 საათზე სან ბერნარდინოს ოლქში, ლოს ანჟელესიდან 96 კილომეტრის მოცილებით, „North Park“-ის დაწყებით სკოლაში მოხდა.

პოლიციის ცნობით, შეიარაღებულმა მამაკაცმა, 53 წლის კედრიკ ანდერსონმა, სკოლაში შესვლა ვიზიტორის სტატუსით მოახერხა და საკლასო ოთახში ცეცხლის გახსნამდე, სადაც სპეციალური საჭიროების მქონე 15 ბავშვი იმყოფებოდა, მას იარაღი დამალული ჰქონდა.

(კარენ სმიტი, მარცხნივ და კედრიკ ანდერსონი, მარჯვნივ)

მან მისი მეუღლე კარენ ელაინ სმიტი მოკლა და საბედისწეროდ დაჭრა 8 წლის ჯონათან მარტინეზი, რომელიც საჰაერო ტრანსპორტით გადაიყვანეს საავადმყოფოში, მაგრამ მოგვიანებით გარდაიცვალა.

Los Angeles Times-ის ინფორმაციით, მე-2 ბავშვი, 9 წლის მოსწავლე, საავადმყოფოში რჩება, თუმცა მისი ჯანმრთელობის მდგომარეობა სტაბილურია.

სან ბერნარდინოს პოლიციის განცხადებით, თავდამსხმელის სამიზნე ბავშვები არ ყოფილან, მაგრამ მათ „მასწავლებელთან ახლო მანძილზე ყოფნის გამო მიიღეს დაზიანებები“, ერთ-ერთმა საბედისწეროდ.

შემთხვევის გამო დაახლოებით 600 ბავშვი იქნა ევაკუირებული ავტობუსების მეშვეობით ქალაქის სხვა სკოლაში, სადაც მოგვიანებით ბავშვებს მშობლები შეახვედრეს.

პოლიცია ამ დროისთვის დამატებით საფრთხეს გამორიცხავს და ინციდენტს ამოწურულად აცხადებს.