კიბოს დიაგნოზი ერთ-ერთი ყველაზე გავრცელებული ცხოვრების შემცვლელი მოვლენაა შოტლანდიელთა ცხოვრებაში და მისი შემთხვევები უფრო მეტია ქორწინებებისა თუ პირველი ბავშვის გაჩენის სტატისტიკასთან შედარებით, როგორც ამას უახლესი კვლევა აჩვენებს.

„მაკმილანის კიბოს მხარდამჭერი ცენტრის“ განცხადებით, 2015 წელს კიბოს დიაგნოზი 31,467 პაციენტს დაუდგინდა, მაშინ როცა ქორწინების რაოდენობა 29,691-ს, ხოლო პირველი ბავშვის შობადობის რიცხვი 23,695-ს შეადგენს.

კიბო ასევე დასახელდა დაავადებად, რომლისაც შოტლანდიაში ყველაზე მეტად ეშინიათ და მისდამი შიში ალცჰეიმერის დაავადებაზე წინ დგას.

როგორც BBC იუწყება, კვლევა ნაწილია კამპანიისა, რომლის მიზანიცაა კიბოს დიაგნოზისადმი შიშის მოცილება.

ციფრებმა აჩვენა, რომ - კანის არა-ავთვისებიანი კიბოს გამოკლებით - შოტლანდიაში ყოველწლიურად კიბოს 1,700-ზე მეტი ახალი შემთხვევაა, ვიდრე ქორწინებები ან 8, 000-ზე მეტი შემთხვევა, ვიდრე ქალების მიერ პირველი შვილის გაჩენა.

„მაკმილანის“ თანახმად, შოტლანდიაში, 5 წელიწადში, პაციენტთა რაოდენობა, რომელთაც კიბოს დიაგნოზი დაუდგინდათ, 18%-ით არის გაზრდილი.

მთლიანად დიდ ბრიტანეთში კი, როგორც ამას დიდი ბრიტანეთის კიბოს კვლევის ცენტრი აცხადებს, 1990-იანი წლების შემდეგ კიბოთი დაავადებულთა რიცხვმა 12%-ით იმატა, მათ შორის ქალებს შორის მატება 16%-ია, ხოლო მამაკაცებს შორის 4%.

„მაკმილანი“ აცხადებს, რომ გარდა იმისა, რომ ცდილობს კიბოს დიაგნოზისადმი შიშის მოცილებას, მის მიერ წამოწყებული კამპანიის - „ცხოვრება კიბოსთან ერთად“ - მიზანია, წინა პლანზე წამოწიოს ის მხარდაჭერა, რომელიც ხელმისაწვდომია ამ დაავადების მქონე ადამიანებისათვის.

BBC-ის ცნობით, გამოკითხულ შოტლანდიელთა 41-მა პროცენტმა განაცხადა, რომ ყველა სხვა დაავადებაზე მეტად კიბოსი ეშინიათ, მაშინ როცა რვიდან ერთმა აღნიშნა, რომ კიბო უფრო მეტად საშიშია, ვიდრე ტერორიზმი ან საყვარელი ადამიანის დაკარგვა.

„მაკმილანის“ პარტნიორობის მენეჯერმა ტრიშა ჰატმა განაცხადა: „ეს კვლევა დიდ მნიშვნელობას ანიჭებს იმას, რომ ბევრი ადამიანისთვის, კიბო ცხოვრების ფაქტი იქნება.

„ავადმყოფობისაგან გადარჩენილთა რიცხვი იზრდება, და თვით ისინიც კი, რომელთაც უკურნებელი სენი აქვთ, ხშირად ბევრი წლის განმავლობაში ცხოვრობენ.

„აღნიშნული ანგარიში იმის მთავარ ხაზგასმას ემსახურება, თუ როგორია ნამდვილი ცხოვრება კიბოსთან ერთად ბევრი ადამიანისთვის, რომლებიც თავიანთი შვილების მიმართ იჩენენ მზრუნველობას, ნახულობენ მეგობრებს და სამსახურშიც კი დადიან.

„ადამიანების უმეტესი ნაწილი ამბობს, რომ მკურნალობის შემდეგ მათ სურთ ნორმალური ცხოვრების შენარჩუნება, რამდენადაც ეს შესაძლებელია. სწორედ ამის გამო, მნიშვნელოვანია მათ მიიღონ მხარდაჭერა, რომელიც ესაჭიროებათ, რომ გაუმკლავდნენ ემოციურ, პრაქტიკულ და ფინანსურ პრობლემებს, რისი გამომწვევი მიზეზიც შეიძლება კიბო იყოს“.