თერჯოლის მუნიციპალიტეტის ხელმძღვანელმა პირებმა 8 აგვისტოს ომში დაღუპულ გმირებს პატივი მიაგეს, გმირთა მემორიალები, საფლავები და ოჯახის წევრები მოინახულეს.

ღონისძიება სოფელ ღვანკითიდან დაიწყო. თერჯოლის მუნიციპალიტეტის გამგებელის მოვალეობის შემსრულებელი თემურ ქოჩიაშვილი, საკრებულოს თავმჯდომარე ავთანდილ ჩუბინიძე, საკრებულოში თერჯოლის მაჟორიტარი დეპუტატი, 8 აგვისტოს ომის მონაწილე, თადარიგის ავიაციის პოლკოვნიკი გიორგი ლილუაშვილი, გამგებლის მოადგილე კახაბერ კუპატაძე, საკრებულოს თავმჯდომარის მოადგილე სოფიო ბუსკივაძე, გამგეობის განათლების, კულტურის, სპორტისა და ახალგაზრდობის საქმეთა სამსახურის უფროსი გურამ თურქაძე, საკრებულოს წევრები და მუნიციპალიტეტის სხვა ხელმძღვანელი პირები ვალერი გოგნაძის მემორიალთან იმყოფებოდნენ. მათ გვირგვინებითა და ყვავილებით შეამკეს მემორიალი და წუთიერი დუმილით პატივი მიაგეს გმირთა ნათელ ხსოვნას.

თერჯოლის მუნიციპალიტეტის გამგეობის ინფორმაციით, მუნიციპალიტეტის ხელმძღვანელმა პირებმა ასევე ყვავილებით შეამკეს სოფელ ძევრში უშანგი სოფრომაძის მემორიალი, ხოლო სოფლებში, კვახჭირსა და ჭოგნარში გიგა სახელაშვილისა და ბადრი ბასილაძის საფლავებს მიაგეს პატივი. ადგილობრივი ბიუჯეტიდან მათ ოჯახებს ფულადი დახმარება გადაეცა.

2008 წლის რუსეთ-საქართველოს ომში თერჯოლიდან 5 მებრძოლი დაიღუპა: ვალერი გოგნაძე, უშანგი სოფრომაძე, გიგა სახელაშვილი, ბადრი ბასილაძე და ალია ბარდაველიძე.