2009 წელს „ნაციონალური მოძრაობის“ მმართველობის დროს თბილისში, იპოდრომის ტერიტორიაზე არსებული მიწა, უცხოურ დეველოპერულ კომპანიაზე გაიყიდა, რის გამოც მოსახლეობის სერიოზული უკმაყოფილება არსებობდა. აქედან გამომდინარე ეს მიწა, „ეს კორტები“ დაუბრუნდება მუნიციპალიტეტს და გაკეთდება სპორტული კომპლექსი, განაცხადა კახა კალაძემ თბილისის მთავრობის სხდომაზე.

მერის თქმით, წინა ხელისუფლების მიერ ურბანული კუთხით ძალიან ბევრი დანაშაუალია ჩადენილი და სადაც თეორიული შანსი მაინც თუ არსებობს ამგვარი ტერიტორიების უკან დაბრუნების და გადარჩენის, იქ ეს კეთდება.

„ნაციონალური მოძრაობის" დანაშაულებრივი ურბანული პოლიტიკის ერთ-ერთ მორიგ მსხვერპლზე მინდა გიამბოთ. ეს არის მიწის ნაკვეთი - იპოდრომის მიმდებარე ტერიტორია არის, კონკრეტულად, საბურთალოსა და ბახტრიონის ქუჩებს შორის - ე.წ. კორტების ტერიტორია. ეს საკითხი ძალიან მტკივნეულია ადგილობრივი მოსახლეობისთვის. ძალიან ბევრი წერილი შემოვიდა ამასთან დაკავშირებით და მგონია, რომ არამხოლოდ ადგილობრივი მოსახლეობისთვის, ზოგადად, ეს ადგილი ყოველთვის იყო სპორტულ-გამაჯანსაღებელი ცენტრი, სადაც ძალიან ბევრი თბილისელი დადიოდა. სამწუხაროდ, 2009 წელს ეს მიწის ნაკვეთი უცხოურ დეველოპერულ კომპანიაზე გაიყიდა, რომელმაც აღნიშნული მიწა განაშენიანების მიზნით შეიძინა. ჩვენ, რა თქმა უნდა, განვითარების, წინსვლის და მშენებლობის მოწინააღმდეგეები არ ვართ, მე ამაზე არაერთხელ მისაუბრია, თუმცა, არის ისეთ ადგილები და ლოკაციები, რომლებიც სასიცოცხლოდ მნიშვნელოვანია ჩვენი ქალაქისთვის. ეს არის სპორტული მოედნები, სპორტული ინფრასტრუქტურა, სკვერები, პარკები და ა.შ. სადაც პირდად ჩემთვის და ჩემი თანაგუნდელებისთვის კატეგორიულად მიუღებელია იქ რამე სახის მშენებლობების განხორციელება. 

სიახლე რაც არის ამ კონკრეტულ თემასთან დაკავშირებით, არის ის, რომ ეს მიწა - ე.წ. კორტები ძალიან მძიმე მდგომარეობაშია დღეს - ეს კონკრეტული ადგილი დაუბრუნდება მუნიციპალიტეტს და აქვე მინდა დაგავალოთ, რომ მომავალი წლისთვის დამუშავდეს პროექტი და მომავალ წელსვე დაიწყოს განხორციელება, სადაც იქნება კორტები, შეიძლება საფეხბურთო მოედანი გაკეთდეს - ანუ პატარა სპორტული კომპლექსი გავაკეთოთ", განაცხადა კახა კალაძემ.