თბილისის მერის, კახა კალაძის განცხადებას - „საქართველოში ტაქსით მომსახურების საფასური უნდა გაიზარდოს“ - პოლიტოლოგი, ილიას სახელმწიფო უნივერსიტეტის პროფესორი გია ნოდია ეხმაურება და კალაძეს „მორალურად და პოლიტიკურად შიგნაკრავს“ უწოდებს.

„საქართველოში რაღაცის სიიაფეს რომ პრობლემად დაინახავს ადამიანი, მორალურად და პოლიტიკურად შიგნაკრავია.

სხვათა შორის, მეტროც და ავტობუსიც ძალიან იაფია, „სხვა ქვეყნებს თუ შევადარებთ“. რა მერე? იმის გაძვირებაზე რატომ არ ვზრუნავთ?

მითუმეტეს, როცა საზოგადოებრივი ტრანსპორტის ხარისხი საკმაოდ დაბალია, რატომ უნდა გინდოდეს მისი ალტერნატივის, ტაქსის, გაძვირება?

გასაგებია რომ უფრო ლამაზი, ფუმფულა და პიწკინა ტაქსები გვინდა, მაგრამ არის უკვე ეგეთი ტაქსებიც. დაიყენე „ტაქსიფაი“ და იარე, სხვაზე ძვირია, მაგრამ სიპიწკინით არ დაიწუნება. რატომ გინდა, რომ ყველას გაუძვირო? ან რატომ უნდა იზრუნო იმაზე, რომ ყველა ტაქსი ერთი ფერის იყოს? მილანში რომ ასეა, ეს არგუმენტია? ხომ ელემენტარულია, რომ თუ ტაქსი გაძვირდა, ნაკლები ტაქსი და ტაქსისტი იქნება. ქვეყანაში, სადაც უმუშევრობაა ნომერ პირველი პრობლემა, ეს რატომ უნდა გამოაცხადო პრიორიტეტად?“, წერს „ფეისბუქზე“ გია ნოდია.

კახა კალაძემ „პალიტრანიუსის“ გადაცემაში „360 გრადუსი“ 2018 წლის 22 დეკემბერს განაცხადა: „ჩვენ ხელს ვუწყობთ ტაქსის მძღოლებს, რომ სწორად განვითარდნენ. ეს ხელშეწყობა გამოიკვეთება იმ ბენეფიტებში, რომლებიც მათ ექნებათ. ეს ყველაფერი უნდა მოვაწესრიგოთ. რა თქმა უნდა, ასევე, მომავალში ტაქსით მომსახურების საფასურიც უნდა გაიზარდოს. დღეს საქართველოში ძალიან იაფია. სხვა ქვეყნებს თუ შევადარებთ, რა თქმა უნდა, იაფია“.