ცაგერის მუნიციპალიტეტის სოფელ ჩქუმში „ჯონოული 2“-ის ჰესის მშენებლობისა და ექსპლუატაციის პროექტის სკოპინგის ანგარიშის საჯარო განხილვა მოეწყო.

ანგარიში მოსახლეობას გარემოს დაცვისა და სოფლის მეურნეობის სამინისტროს წარმომადგენლებმა გააცნეს და მოისმინეს ადგილობრივთა მოსაზრებები ჰიდროელექტროსადგურის მშენებლობასთან დაკავშირებით. მოსახლეობას განემარტა, რომ სკოპინგის ანგარიში არის პროექტის განხორციელების ერთ-ერთი ეტაპი, რომლის შემდგომაც მოხდება გარემოზე ზემოქმედების შეფასების დოკუმენტის შედგენა და მისი ასევე საჯარო განხილვა.

განხილვას ადგილობრივ მოსახლეობასთან ერთად მხარის სახელმწიფო რწმუნებული არჩილ ჯაფარიძე, ცაგერის მუნიციპალიტეტის მერი ავთანდილ უგრეხელიძე და საკრებულოს თავმჯდომარე გიორგი გუგავა დაესწრნენ.

არჩილ ჯაფარიძემ მადლობა გადაუხადა სამინისტროს წარმომადგენლებს და აღნიშნა, რომ მსგავსი ტიპის შეხვედრები არის ძალზე მნიშვნელოვანი, რათა დაინტერესებულ პირებს ჰქონდეთ შესაძლებლობა ჩაერთონ პროექტის განხორციელების თითოეულ ეტაპზე და იყვნენ სრულად ინფორმირებულნი. სახელმწიფოს მიერ თითოეული პროექტი იგეგმება ქვეყნისა და მოსახლეობის ინტერესების გათვალისწინებით, ამიტომ მნიშვნელოვანია დაველოდოთ პროექტის გარემოზე ზემოქმედების შეფასების დოკუმენტს და ამის შემდგომ მოხდეს მსჯელობა მისი კონკრეტული ფორმით განხორციელების შესახებ.

2017 წელს ენერგეტიკის სამინისტრომ რაჭა-ლეჩხუმისა და ქვემო სვანეთის რეგიონში მდინარე ჯონოულზე ასაშენებელი „ჯონოული 2 ჰესის“ ტექნიკურ-ეკონომიკური კვლევის ჩატარების, მშენებლობის, ფლობისა და ოპერირების მიზნით ინტერესთა გამოხატვა გამოაცხადა.

„ჯონოული 2 ჰესის“ დაგეგმილი დადგმული სიმძლავრე 32.00 მვტ-ია, სავარაუდო წლიური გამომუშავება კი 129.20 მლნ.კვტ.სთ. პროექტის სავარაუდო საინვესტიციო ღირებულება 50,000,000 აშშ დოლარს შეადგენს.

ინფორმაციას რაჭა-ლეჩხუმისა და ქვემო სვანეთის სამხარეო ადმინისტრაცია ავრცელებს.