ლეიბორისტული პარტიის ირგვლივ ბოლო დროს განსაკუთრებული ხმაურია ატეხილი. შალვა ნათელაშვილის ბაზალეთის სახლის ფოტოებმა ინტერნეტმედია დაიპყრო. მისი პარტიის ყოფილი წევრები კი ნათელაშვილის რუსულ დაფინანსებაზე ლაპარაკობენ და ბაზალეთის სახლს 5 მილიონად უფასებენ. გუშინ, ლეიბორისტების ოფისთან „თავისუფალი თაობა“ მივიდა და მათგანაც იგივე სახის განცხადებები გაკეთდა. ლეიბორისტებმა ამ ფაქტებთან დაკავშირებით „ფოსტალიონთან“ ასეთი კომენტარი გააკეთეს:


„ივანიშვილის მართულმა მედიამ ისე აიტაცა შალვა ნათელაშვილის ფუძისეული სახლის სურათი, თითქოს გუშინ ააშენა, ან სადმე სარდაფში ჰქონდა დამალული და ახლა აღმოაჩინეს. ეს სახლი გასული საუკუნის 90-იანი წლებიდან შენდება, როცა ბატონი შალვა ჯერ კიდევ პროკურატურაში მუშაობდა. ბოლო წლებში სხვენი გამოცვალეს და გვერდით გაუკეთეს მიშენება. 5 მილიონი თქვეს არა? სასაცილოა, ალბათ მთელი ბაზალეთის ქონება დაითვალეს. ამ სახლში თითქმის ყველა ჟურნალისტია ნამყოფი, ვისაც კი გასჩენია და გამოუთქვამს ამისი სურვილი და მისი დამალვა არავის, არასდროს არ უცდია.


კარგა ხანია ივანიშვილის დავალებით შალვა ნათელაშვილისა და ლეიბორისტული პარტიის წინააღმდეგ მიდის მიზანმიმართული კამპანია, რისთვისაც ხშირად იყენებენ პარტიიდან გაყრილ მოღალატეებს. უსინდისობაა, როცა სოსო შატბერაშვილი სხვის ქონებაზე ლაპარაკობს. შალვა ნათელაშვილის ქონება არასდროს ყოფილა დამალული და საზოგადოებისთვის უცნობი. თბილისში, საბურთალოზე,  მას აქვს 120 კვადრატული მეტრი ბინა, რომელიც  გაყიდული ბინის ფულით შეიძინა. ასევე აქვს მამა-პაპისეული ფუძე ბაზალეთში, რომელიც სხვების მსგავსად ბიუჯეტიდან და  ხალხისთვის მოპარალი ფულით არ აუშენებია. 25 წელი რომ აშენებ სახლს და დღესაც ბოლომდე დაუსრულებელია, ეს არის კომპრომანტი? ვინც არ დამიჯერებს, გაუშვას ნებისმიერი ჟურნალისტი რომელიც თავად დარწმუნდება, რომ სიმართლეს ვამბობ და სახლი ახლაც არის დაუმთავრებელი.  ნათელაშვილი საკუთარი ხელით, წლობით რომ აკეთებდა მამა-პაპის სახლს და ეზოს, ამას მათი ოჯახის ალბომის ძველი ფოტოებიც მოწმობს, რომელსაც ახლა გადმოგცემთ. ცოტა ხანში კი ამ სახლის შენების დროინდელ  ფოტოებსაც მოგაწვდით და ყველა მიხვდება, რომ ის ახალი აშენებული არ არის.

 

სხვათა შორის ლეიბორისტული პარტიიდან გაგდებული კახა ძაგანია ამბობდა, ნათელაშვილს სააკაშვილის მიცემული ფული დიდი ნაძვის ძირში აქვს დამალულიო და ასეთს რა ველაპარაკოთ? ჩვენი პარტიის რეიტინგი დღეს მაღალია და მზარდი, ოცნებისა კი ყოველდღე კატასტროფულად კლებულობს. ამიტომაც ცდილობენ ლეიბორისტული პარტიის დისკრედიტაციას ასეთი ადამიანების ხელით.


პარტიიდან კიდევ ერთ გაგდებულს შევეხები, სოსო შატბერაშვილს. ვის ქონებაზე ლაპარაკობს სოსო თოფურიძის მეგობარი, თანაკლასელი და ჩვენს პარტიაში აგენტად შემოგზავნილი ადამიანი? ნახეთ მისი ქონებრივი დეკლარაცია, რომელიც 2012 წელს აქვს შევსებული. ნახეთ რამდენი სახლი და აგარაკი აქვს მითითებული. სხვაზე რაც აქვს გაფორმებული, ეს კიდევ სხვა სალაპარაკო თემაა. ეს არის ნაციონალური მოძრაობის პერიოდი, ჩვენ კი, მისი ქონებების შესახებ მაშინ გავიგეთ, როცა სხვა პარტიაზე გაიყიდა. დეკლარაციაში აუცილებლად დააკვირდით იმას, რომ  სოსო შატბერაშვილის შვილი თბილისის მერიის თანამშრომელია.


რა ქონებები დააგროვეს ივანიშვილის ფულით, რა ბიზნესები მოიწყეს, ამის შესახებ ინფორმაციას ჟურნალისტებს აუცილებლად მივაწვდით. აქამდე თავს ვიკავებდით, რადგან პარტიის თავმჯდომარე თვლის, რომ ყოფილ თანაგუნდელებზე ლაფის დასხმა არაა წესიერი საქმე. ახლა აუცილებლად ვიტყვით ვის, რას, ვინ და როგორ სთავაზობდა 2012 წელს, როგორ აწყობდნენ შეთქმულებას იმ პარტიის წინააღმდეგ სადაც იყვნენ და ა.შ. არა მგონია ამის შემდეგ რომელიმეს მორალური უფლება ჰქონდეს,  შალვა ნათელაშვილზე ილაპარაკოს“ _განაცხადა ლეიბორისტული პარტიის ანალიტიკურმა მდივანმა ნინო მეტრეველმა.


წყარო: postalioni.com