2020 წლის ბიუჯეტში გათვალისწინებულია ყველა პენსიონერისთვის 20 ლარით პენსიის გაზრდა, 1-ლი ივლისიდან კი 70 წელს გადაცილებული პენსიონერებისთვის დამატებით 30 ლარით გაზრდა, განაცხადა საქართველოს პრემიერ მინისტრმა, გიორგი გახარიამ მთავრობის რიგგარეშე სხდომაზე.

„პრინციპების დონეზე ჩვენ შეგვიძლია ვთქვათ, რომ 2020 წლის ბიუჯეტში გათვალისწინებულია ყველა პენსიონერისთვის, ასევე 18 წლამდე ასაკის და პირველი და მეორე ჯგუფის შეზღუდული შესაძლებლობის მქონე პირებისთვის 20 ლარით პენსიის ზრდა.

„გარდა ამისა, პირველი ივლისიდან, ასევე 70 წელს გადაცილებული პენსიოერებისთვის დამატებით პენსიის 30 ლარით ზრდა, რაც იმას ნიშნავს, რომ მომავალი წლის ბიუჯეტში ამ ჯგუფის მოქალაქეებს პენსია გაეზრდებათ 50 ლარით“, განაცხადა გახარიამ.

პრემიერმა ასევე თქვა, რომ მოხდება ხელფასების მატება სხვადასხვა მიმართულებით, მათ შორის სკოლებისა და ბაგა-ბაღების პედაგოგებისთვის.

„მინდა მინდა მოგახსენოთ, რომ სრულ განაკვეთზე მყოფი მასწავლებლების ანაზღაურება იზრდება, როგორც მიმდინარე, ასევე მომავალი წლის სასწავლო განმავლობაში, რაც ნიშნავს, რომ 2020 წლის სასწავლო წლისთვის მასწავლებლების ხელფასი გაიზრდება სამასი ლარით“, - განაცხადა გიორგი გახარიამ მთავრობის სხდომაზე.

პრემიერის თქმითვე, „2020 წლის სასწავლო წლისთვის საბავშვო ბაღების მასწავლებლების ხელფასები გაიზრდება საშუალოდ, 100 ლარით“.

„გარდა ამისა, გაგრძელდება ხელფასების მატება სამართალდამცველების, ჯარისკაცების და მათან გათანაბრებული პირებითვის და სახელმწიფო თავისი ვალლდებულების ფარგლებში ამ ჯგუფს ხელფასს გაუზრდის, მინიმუმ 125 ლარით“, თქვა გახარიამ.