არ შეიძლება, ილაპარაკო იმ ადამიანის უმწიკვლო წარსულზე, რომელიც შენთან პოლიტიკურად დაპირისპირებულ სამართალდამცავთა ჯგუფშია, - ამის შესახებ გია ვოლსკიმ ჟურნალისტებს დაჭრილ ლევან გვაზავასთან დაკავშირებით შს მინისტრის პირველი მოადგილის, სასაზღვრო პოლიციის უფროსის, ზურაბ გამეზარდაშვილისა და სპორტისა და ახალგაზრდობის საკითხთა მინისტრის ტარიელ ხეჩიკაშვილის განცხადებების კომენტირებისას განუცხადა.


საპარლამენტო ფრაქცია ”ქართული ოცნების” თავმჯდომარის  თქმით,  ეთანხმება დეპუტატ ლუკა კურტანიძის პათოსს და მიიჩნევს, რომ თანაგრძნობის გამოხატვა ბუნებრივია, თუმცა პოლიტიკური თემის შემოტანა სწორედ მაშინ მოხდა, როდესაც ვანო მერაბიშვილის მოადგილის უმწიკვლობაზე გაკეთდა აქცენტი.


"სამწუხაროდ, ტრაგიკულ ფაქტზე ვლაპარაკობთ. აქედან გამომდინარე, პოლიტიკური პოზიციები ძალიან ფერმკრთალდდება იმ ოჯახის უბედურებასთან შედარებით. რომელ პოლიტიკურ დებატებზე ვსაუბრობთ, როდესაც ცოცხალი ადამიანი აღარ არსებობს ან მეორემ, ლევან გვაზავამ, წინასწარი მონაცემებით, თვითმკვლელობა სცადა. ესეც დიდი ტრაგედიაა ოჯახისთვის. ლუკა კურტანიძეს ვეთანხმები – არ შეიძლება, ამ შემთხვევაში ილაპარაკო ადამიანის უმწიკვლო წარსულსა ან აწმყოზე, როდესაც იმ სამართალდამცავთა, თუ ადამიანის უფლებათა დამცავთა ჯგუფშია, რომელსაც პოლიტიკურად უპირისპირდები. ალბათ, მინისტრის მოადგილემაც, მინისტრმაც მომავალში გამოსვლის დროს ხაზი უნდა გაუსვან იმას, რომ ამ შემთხვევაში მათ პოლიტიკურ კრედოს მნიშვნელობა არ აქვს; ჩვენ ყველა ადამიანები ვართ და გულწრფელად უთანაგრძნობენ იმ ადამიანის ოჯახს, რომელსაც წლების განმავლობაში იცნობენ. რამდენად უმწიკვლო იყო ვანო მერაბიშვილის მოადგილე, რამდენად პატიოსანი საქმეებით იყო დაკავებული, ეს მეორე საკითხია. ჩვენ ვცხოვრობთ ვაჟა-ფშაველას ქვეყანაში, სტუმარ-მასპინძლის ავტორის პრინციპებით ვართ გაზრდილი, კიდევ ბევრი სხვა პრინციპი არსებობს, რომელიც სულგრძელობას გვავალებს. აქედან გამომდინარე, ვხედავ რესურსს და საფუძველს განცხადებებისა, რომელიც მინისტრის მოადგილემ და მინისტრმა გააკეთეს, მაგრამ ვფიქრობ, შეცდომაა ის, რომ მაინცდამაინც უმწიკვლოებაზე და პატიოსნებაზე ვისაუბროთ. ადამიანური ფაქტორი ჩვენთვის ყველასთვის ერთია, მაგრამ აქ პოლიტიკური თემის შემოტანა მოხდა სწორედ მაშინ, როდესაც ვანო მერაბიშვილის მოადგილის უმწიკვლოებაზე გაკეთდა განცხადება", - განაცხადა ვოლსკიმ და დასძინა, რომ პრინციპულად წინააღმდეგია, ამ თემაზე კამათი პოლიტიკურ სიბრტყეში გადავიდეს.


ინგოროყვას კლინიკაში, სადაც ლევან გვაზავაა გადაყვანილი, სპორტისა და ახალგაზრდობის საკითხთა მინისტრი ტარიელ ხეჩიკაშვილი და შინაგან საქმეთა მინისტრის მოადგილე ზურაბ გამეზარდაშვილი 29 აგვისტოს იმყოფებოდნენ. გამეზარდაშვილმა ჟურნალისტებს განუცხადა, რომ "ლევან გვაზავა არის წესიერი კაცი და მასზე მუქარა არ შეიძლებოდა ყოფილიყო", რასაც ლუკა კურტანიძის მწვავე რეაქცია მოჰყვა.