პლატფორმა „სუფთა სივრცე“ საქართველოს შერიგებისა და სამოქალაქო თანასწორობის საკითხებში სახელმწიფო მინისტრის, ქეთევან ციხელაშვილის ავსტრიაში საქართველოს ელჩად დანიშვნის ფაქტს ეხმაურება და განცხადებას ავრცელებს.

„ვეხმაურებით საგარეო საქმეთა მინისტრის განცხადებას საქართველოს შერიგებისა და სამოქალაქო თანასწორობის საკითხებში სახელმწიფო მინისტრის, ქალბატონ ქეთევან ციხელაშვილის, ავსტრიაში საქართველოს სრულუფლებიან ელჩად განწესებასთან დაკავშირებით, შესაბამისად, სახელმწიფო მინისტრის აპარატს ახალი ხელმძღვანელი ეყოლება.

მიუხედავად იმისა, რომ კონფლიქტების ტრანსფორმაცია, აფხაზებთან და ოსებთან შერიგებისა და ნდობის აღდგენა ფრთხილი და სენსტიური საკითხია, ბოლო დროს კონფლიქტურ რეგიონებში განვითარებულმა პოლიტიკურმა მოცემულობამ და ასევე პანდემიასთან დაკავშირებით სახელმწიფო მინისტრის აპარატის პოზიცია იყო გაუგებარი და ბუნდოვანი, რამაც მთელი რიგი კითხვები გამოიწვია. სამოქალაქო სექტორში, ჩვენი ღრმა რწმენით, შესაძლებელი იყო ამ პროცესების შედარებით ეფექტიანად წარმართვა. შერიგებისა და ნდობის აღდგენის პროცესებში ჩართული სამოქალაქო საზოგადოებისთვის უაღრესად მნიშვნელოვანია სახელმწიფო მინისტრის აპარატს უხელმძღვანელოს ისეთმა კვალიფიციურმა და გამოცდილმა ადამიანმა, რომელიც შეძლებს სწორად შეაფასოს აფხაზებთან და ოსებთან შერიგებისა და ნდობის აღდგენის შესაძლებლობები და პერსპექტივები, ასევე, სამოქალაქო საზოგადოებასთან ერთად იმუშავებს ფართო სტრატეგიული ხედვის ჩამოყალიბებაზე და პრიორიტეტების სწორად განსაზღვრაზე, რადგან სასიცოცხლოდ მნიშვნელოვანია შიდა პოლიტიკური ამოცანის გააზრებულად შესრულება, აფხაზებთან და ოსებთან შერიგების პროცესის დინამიურობა, პირდაპირი კონტაქტების გაძლიერება და ხელშესახები საქმიანობის განხორციელება.

სამოქალაქო საზოგადოების პლატფორმა „სუფთა სივრცე“ იმედოვნებს, რომ ხელისუფლება პასუხისმგებლობით მოეკიდება აღნიშნულ საკითხს და უწყებისთვის მკაფიოდ განსაზღვრული მანდატის ფარგლებში შესაბამის კანდიდატურას წარადგენს” , - ნათქვამია განცხადებაში.