სამცხე-ჯავახეთის სამხარეო ადმინისტრაციის რეგიონული პროექტების კოორდინირების სამსახურის უფროსი მარინა გაჩეჩილაძე, ქალაქ ახალციხის მერი, ახალციხის, ადიგენის, ასპინძის, ნინოწმინდისა და ბორჯომის მუნიციპალიტეტის გამგებლები სამუშაო ვიზიტად თურქეთში, ქალაქ არტაანში იმყოფებოდნენ.
სამცხე-ჯავახეთის დელეგაციას წარმოადგენდნენ ასევე, რეგიონში მოქმედი ბიზნესმენები, ბორჯომ-ხარაგაულის ეროვნული ტყე-პარკისა და ჯავახეთის დაცული ტერიტორიების ვიზიტორთა ცენტრის ხელმძღვანელები.
სამცხე-ჯავახეთის სამხარეო ადმინისტრაციის ინფორმაციით, ვიზიტის ფარგლებში შეხვედრები გაიმართა არტაანის გუბერნატორთან აჰმედ დენიზთან, ქალაქ არტაანის მერთან ფარუქ ქოქსოისთან და სავაჭრო სამრეწველო პალატის თავმჯდომარესთან ჩეთინ დემირჯთან, სადაც მეზობელ რეგიონებს შორის მეგობრული კავშირების, სავაჭრო და ტურისტული ურთიერთობების გაღრმავების შესახებ იმსჯელეს. აღინიშნა რომ, ურთიერთობა, რომელიც სამცხე-ჯავახეთსა და არტაანის მხარეს შორის ყალიბდება, მჭიდრო მეგობრობაზეა ორიენტირებული.
„ის კულტურა, ის ტურისტული პოტენციალი, რაც თქვენს რეგიონს გააჩნია, ძალზედ მომხიბვლელია. გვიხარია, რომ თქვენი სახით მეგობარი მხარე გვყავს. იმედი გვაქვს კიდევ უფრო განვავითარებთ ჩვენს შორის ურთიერთობებს, სამცხე-ჯავახეთსა და არტაანში საკმაოდ დიდი პოტენციალია ერთობლივი პროექტების განსახორციელებლად, არა მარტო სოფლის მეურნეობის, არამედ ტურიზმის სფეროშიც, ამასთან გვაქვს ძალიან დიდი უპირატესობაც, ჩვენს შორის ორი სასაზღვრო გამტარი პუნქტის სახით“, აღნიშნა არტაანის გუბერნატორმა აჰმედ დენიზმა.
გუბერნატორის ადმინისტრაციის რეგიონული პროექტების კოორდინირების სამსახურის უფროსმა მარინა გაჩეჩილაძემ მადლობა გადაუხადა არტაანის გუბერნატორს და სავაჭრო-სამრეწველო პალატის თავმჯდომარეს მოპატიჟებისათვის და აღნიშნა რომ, „ ის კეთილგანწყობა, რომელიც დღევანდელ შეხვედრებზე იგრძნობა ერთობლივი წარმატებული საქმიანობის აუცილებელი პირობაა და ვფიქრობთ, მომავალში ჩვენი მეგობრობა კიდევ უფრო გაღრმავდება“.
არტაანის მერიაში გამართულ ოფიციალურ შეხვედრაზე, არტაანის მერმა ფარუქ ოქსოიმ ისაუბრა აგრეთვე, ამ შეხვედრების მნიშვნელობაზე და მიიღო ქართული მხარის შეთავაზება ქალაქ არტაანს და ქალაქ ახალციხეს შორის ურთიერთმეგობრობის მემორანდუმის გაფორმების შესახებ. მან ქალაქ ახალციხის ფოლკლორული და ქორეოგრაფიული ანსამბლები ფესტივალზეც მიიპატიჟა.
„ მისასალმებელია ახალციხისა და არტაანს შორის დამეგობრების იდეა, ვფიქრობ საქმიანი, საპროტოკოლო შეხვედრების გარდა, სამუშაო ჯგუფმა უნდა იმუშაოს ერთობლივი კულტურული ღონისძიებებისა თუ ფესტივალების ჩასატარებლად, რათა ჩვენი მოსახლეობა ახლოს გაეცნოს ერთმანეთის კულტურას, შემოქმედებას, ტრადიციებს. დარწმუნებული ვარ, ეს სასურველ შედეგს აუცილებლად გამოიღებს და ურთიერთობებს კიდევ უფრო აქტიურს გახდის.“- განაცხადა ქალაქ არტაანის მერმა.
ვიზიტის ფარგლებში გაიმართა ბიზნეს-ფორუმი, რომელსაც 100 -მდე თურქი ბიზნესმენი ესწრებოდა. მხარეებმა იმსჯელეს მეზობელ რეგიონებს შორის აქტიური სავაჭრო კავშირებისა და სასურველი ბიზნესგარემოს შექმნის აუცილებლობაზე, ინვესტიციების მოზიდვასა და ტურიზმის სფეროში ურთიერთთანამშრომლობის საკითხებზე. ქართული დელეგაციის წარმომადგენლებმა ფორუმის მონაწილე თურქ ბიზნესმენებს შესაბამისი ვიდეო და ფოტოსლაიდების მეშვეობით რეგიონის ეკონომიკური და ტურისტული პოტენციალი გააცნეს. შეხვედრა მიმდინარეობდა აქტიური კითხვა-პასუხის რეჟიმში.
ამასთანავე, ქართული დელაგაციის შემადგენლობაში მყოფი ის მეწარმეები, რომლებიც რძის გადამუშავების ბიზნესით არიან დაკავებული, გაეცვნენ მეზობელ რეგიონში რძის გადამამუშავებელი საწარმოების საქმიანობას.
შეხვედრის ოფიციალური ნაწილის დასრულების შემდეგ ქართული დელეგაციის წევრებმა არტაანის გუბერნატორთან და ქალაქის მერთან ერთად ახალი სავაჭრო ობიექტი გახსნაში მიიღეს მონაწილეობა.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.