დღევანდელ საპარლამენტო განხილვას რა შეიძლება, ვუწოდო? ტანჯვა-წამების 8 საათი. იდგა მთავრობის მეთაური და იტანჯებოდა, - ასე შეაფასა „ნაციონალური მოძრაობის“ წევრმა, რომან გოცირიძემ პრემიერ მინისტრის, ირაკლი ღარიბაშვილის პარლამენტში გამოსვლა და დეპუტატების შეკითხვებზე პასუხების გაცემის პროცესი.

„ვერც ერთ შეკითხვას ვერ გასცა პასუხი, მე საერთოდ არაფერზე მიპასუხა, ანდა როგორ უნდა ეპასუხა, როდესაც 128 მილიონი მოიპარეს ბიუჯეტიდან გრილ კაბინეტში ჩინოვნიკებმა, დღგ-ის მანიპულაციით, კომპიუტერზე კლავიატურის ჩხაკუნითა და ხელმოწერით, რომლის მოპარვასაც 86 ბანკის გაძარცვა დასჭირდებოდა-მეთქი იმ ყაჩაღ ესებუას, რომელიც ტყეში იმალება. ხუმრობასაც კი ვერ მიხვდა, ესებუა მოსწონსო ასეთი პასუხი გამცა. ეს იყო მთელი მისი პასუხი ჩემს შეკითხვაზე. ორშაბათს იქნება მთავარი გამოსვლები და მეტი მხილება ამ ხელისუფლების წარუმატებელი საქმიანობისა. ჩვენ არა მთავრობას, არამედ საზოგადოებას შევთავაზებთ გამოსავალს. შევთავაზებთ იმ გამოსავალს, რომელიც ქვეყანას ამოიყვანს ამ მძიმე ეკონომიკური მდგომარეობიდან“, - განაცხადა რომან გოცირიძემ.