საკოორდინაციო საბჭო ამ ეტაპზე მკაცრ ლოქდაუნს არ განიხილავს, არამედ განიხილავს იმ რეკომენდაციების მაქსიმალურად აღსრულებას, რაც დღეს არის დაწესებული, – ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა.

„რაც შეეხება საწოლების რაოდენობას, დღეს საავადმყოფოებში არის 5 000-მდე ადამიანი, ჯერჯერობთ ჯანდაცვის სიტემა ამ დაწოლას უძლებს. მოგეხსენებათ, ნოემბერში, კორონავირუსის გავრცელების პიკზე ჩვენ გვქონდა 7 500-8 000 საწოლი გაშლილი. ამიტომ, საწოლფონდთან დაკავშირებით ჯერჯერობით ჯანდაცვის სისტემას რესურსი აქვს. ყოველდღიურად ემატება ახალი საწოლების რაოდენობა სხვადასხვა კლინიკაში. ჯანდაცვის მინისტრის მითითებით, გუშინ გაჩერდა ეგრეთ წოდებული გეგმური სერვისები საავადმყოფოებში. საავადმყოფოები მხოლოდ ურგენტულ სერვისებზე გადადიან. შესაბამისად, საწოლფონდიც მეტად გამოთავისუფლდება“, – განაცხადა ამირან გამყრელიძემ.