„დემოკრატიული მოძრაობის“ წევრის გიორგი კობახიძის განცხადებით, ხელისუფლება საარჩევნო კოდექსთან დაკავშირებით ფეხს ითრევს. მისი შეფასებით, თვითმმართველობის კოდექსში რამდენიმე ხარვეზია დარჩენილი, რაზეც ღარიბაშვილი თვალს ხუჭავს. როგორც კობახიძემ გაზეთ „ახალ თაობასთან“ საუბრისას აღნიშნა, ეს იმ პარტიის მიმართ კომპრომისს ნიშნავს, რომელმაც კოდექსის პროექტი მოამზადა.

„კოდექსში კიდევ ბევრი რამ არის ისეთი, რასაც არ გააკეთებდა ღარიბაშვილი, რომ არა კომპრომისის შეგრძნება. ვიმეორებ, ძალიან მნიშვნელოვანია საარჩევნო კოდექსი“- განაცხადა კობახიძემ.

მისი განცხადებით, გამგებლების 33%-ით და მერების 40%-ით არჩევა ნიშნავს, იმას რომ ყველა გამგებელი და ყველა მერი „ქართული ოცნების“ უნდა იყოს, რაც იმთავითვე დემოკრატიასთან წინააღმდეგობაში მოდის, რადგან კობახიძის თქმით, ერთმმართველობისკენ გადადგმული ნაბიჯი დემოკრატიისკენ ზურგის შექცევაა.

„მერის არჩევნებზე 40%-იანი ბარიერის განსაღვრის მიზეზი შეიძლება იყოს ერთადერთი - პირველივე ტურში მოათავონ საქმე, ანუ პირისპირ დარჩნენ რომელიმე ოპოზიციურ კანდიდატთან. „ნაცმოძრაობას“ პირველ ტურში 40%-იანი ბარიერის გადალახვის შანსი არ აქვს. რაც შეეხება მეორე ტურს, „ნაცმოძრაობა“ თავის ხმებს ვერაფერს უმატებს იმიტომ, რომ ყველა დანარჩენი ოპოზიციური პარტია უფრო მწვავედ არის განწყობილი „ნაცმოძრაობის“ მიმართ, ვიდრე „ქართული ოცნების“ მიმართ. აქედან გამომდინარე, იმის შიში, რომ „ნაციონალებთან“ „ოცნების“ წარმომადგენლები პირისპირ არ დარჩნენ, რომ წააგონ, ეს გამორიცხულია. ამას იმ დასკვნამდე მივყავართ, რომ ე.წ. პარლამენტრს გარეთ დარჩენილი ოპოზიციური პარტიების წარმომადგენლებს მისცენ შანსი“- განაცხადა კობახიძემ და აღნიშნა, რომ ხელისუფლების ასეთი გადანაწილება, პირველ რიგში, „ოცნებისთვის“ არის სასარგებლო, თუ წარსულის მაგალითები მისთვის მართლაც მაგალითებია.

„ხელისუფლებამ უნდა იცოდეს, რომ ის ყველაფერი სისტემამ მოიტანა და არა „ნაციონალების“ ვერგათვლამ. და მეორე, ერთადერთი, სადაც „ქართულმა ოცნებამ“ არჩევნები წააგო, იყო სამეგრელო და, პირველ რიგში, ზუგდიდის რაიონი. ამ 40%-იანი ბარიერის შემთხვევაში, ძველი შედეგები თუ განმეორდა, გამოდის, რომ „ოცნება“ ზუგდიდს „ნაცმოძრაობას“უთმობს. ამას იმიტომ ვამბობ, რომ „ნაცმოძრაობის“ პროცენტი 40-სა და 50-ს შორის იყო“- განაცხადა კობახიძემ.

http://www.newspress.ge/presis-mimokhilva/35510-giorgi-kobakhidze-33-da-40-iani-barieri-nishnavs-imas-rom-yvela-gamgebeli-da-meri-qarthuli-ocnebis-unda-iyos.html