რუსეთ-საქართველოს 2008 წლის აგვისტოს ომიდან 9 წელი შესრულდა. რუსულ აგრესიას საქართველოს 228 მშვიდობიანი მოქალაქე, 169 სამხედრო მოსამსახურე და 14 პოლიციელი ემსხვერპლა.


5 სამხედრო პირი უგზო-უკვლოდ დაკარგულია. კანონის გათვალისწინებით, ვინაიდან ორი წლის განმავლობაში ვერ აღმოაჩინეს ვერც ცხედარი, არც რაიმე მინიშნება მათი სიცოცხლის შესახებ, მათ გარდაცვლილის სტატუსი მიენიჭათ.


ჯანდაცვის სამინისტროს მონაცემებით, აგვისტოს ომში დაჭრილთა და დაშავებულთა რიცხვი 2 232-ია. მათ შორის არიან როგორც სამოქალაქო, ისე სამხედრო პირები. ამათგან სამხედრო მოსამსახურეთა რაოდენობა 1045-ია. აღნიშნული 1045 პირიდან 2008 წლის აგვისტოს ომის შედეგად 526 შეიარაღებულ ძალებში აღარ მსახურობს, 61 სამხედრო კი დათხოვნილია ავადმყოფობის გამო.


სახლები დატოვა თითქმის 150 000-მა ადამიანმა, მათგან დღემდე დევნილობაში 30 000-მდე პირი რჩება.


8 აგვისტოს, დაახლოებით 00:30 საათზე საქართველოს ხელისუფლებამ ქართულ-ოსურ კონფლიქტის ზონაში კონსტიტუციური წესრიგის აღდგენის შესახებ გადაწყვეტილება მიიღო.


საქართველოს შეიარაღებული ძალები სეპარატისტული ცხინვალის ფორმირებებთან და რუსულ არმიასთან კონფლიქტში ჩაება. საქართველოს ტერიტორიაზე როკის გვირაბის გავლით და ფსოუს საზღვრიდან 15 ათასამდე რუსი სამხედრო შემოვიდა.


ქართულმა შენაერთებმა ცხინვალი დაიკავეს, თუმცა რუსული ავიაციის იერიშების შემდეგ უკან დაიხიეს. რუსულმა ავიაციამ საჰაერო იერიშები მიიტანა საქართველოს სხვადასხვა ქალაქში განთავსებულ სამხედრო ბაზებსა და აეროდრომებზე. ორჯერ დაიბომბა გორი, მათ შორის სამხედრო ბაზის ტერიტორია. რუსულმა ავიაციამ თბილისის ვაზიანის ბაზა, საავიაციო ქარხანა, ქვიშიანის მთაზე მდებარე რადარიც დაბომბა. დაიბომბა ფოთის პორტი, სენაკისა და მარნეულის სამხედრო ბაზები.


რუსეთის 58-ე არმიამ, ცხინვალისა და სოხუმის რეჟიმების მიერ კონტროლირებად ტრიტორიებთან ერთად, ახალგორის მუნიციპალიტეტი, ზემო აფხაზეთი, ზუგდიდი, გორის მუნიციპალიტეტის რამდენიმე სოფელი, საჩხერეში სოფელი პერევი დაიკავა.

აქტიური საბრძოლო მოქმედებების შეწყვეტა საფრანგეთის პრეზიდენტის, ნიკოლა სარკოზის ჩარევის შედეგად მოხერხდა. სარკოზიმ 12 აგვისტოს 6-პუნქტიანი სამშვიდობო გეგმა ჯერ მოსკოვში, შემდეგ კი თბილისში შეათანხმა. 8 სექტემბერს კი, მედვედევთან და სააკაშვილთან სამშვიდობო გეგმის ახალი დეტალები დააზუსტა.


ცეცხლის შეწყვეტის შესახებ შეთანხმების მიხედვით, რუსულ შეიარაღებულ შენაერთებს კონფლიქტის ზონების გარეთ მდებარე ტერიტორია ერთი თვის ვადაში უნდა დაეტოვებინათ, თუმცა, რუსეთის მიერ დღემდე არ სრულდება 6 პუნქტიანი გეგმა, რაც გულისხმობს:


ძალის გამოყენებაზე უარის თქმას;


საბრძოლო ქმედებებზე უარის თქმას;


ჰუმანიტარული დახმარებისთვის თავისუფალი მიმოსვლის უზრუნველყოფას;


საქართველოს შეიარაღებული ძალების დაბრუნებას მათი ჩვეულებრივი დისლოკაციის ადგილებში;


რუსეთის შეიარაღებული ძალების დაბრუნებას სამხედრო მოქმედებების დაწყებამდე არსებულ ხაზზე. საერთაშორისო მექანიზმის შექმნამდე რუსეთის სამშვიდობო ძალების მიერ უსაფრთხოების დამატებითი ზომების განხორციელებას;


საერთაშორისო დისკუსიების დაწყებას აფხაზეთსა და სამხრეთ ოსეთში უსაფრთხოებისა და სტაბილურობის პირობების შესახებ.


2008 წლის 27 აგვისტოს კი რუსეთის დუმამ აფხაზეთისა და სამხრეთ ოსეთის დამოუკიდებლობის აღიარებას მხარი დაუჭირა, მეორე დღეს კი ქვეყნის პრეზიდენტმა შესაბამის დოკუმენტს ხელი მოწერა.


2008 წლის 23 ოქტომბერს საქართველომ მიიღო კანონი “ოკუპირებული ტერიტორიების შესახებ”, რომლითაც განსაზღვრა რუსეთის მიერ ოკუპირებული ტერიტორიების სტატუსი და იქ განსაკუთრებული სამართლებრივი რეჟიმი დადგინდა.