შარაძის საქმეში ახალი მოწმე გამოჩნდა.
გარდაცვლილი მეცნიერის გურამ შარაძის ქალიშვილი, რუსუდან შარაძე გაზეთ "კვირის პალიტრასთან" მამის მკვლელობის შესახებ ახალ დეტალებს ყვება. რუსუდან შარაძის თქმით, გურამ შარაძის მკვლელობის ორგანიზება მეგის ქარდავამ ზუგდიდელ პოლიციელს გურიკა ქადარიას დაავალა. მეგის ქარდავას სქემის მიხედვით, ქადარიასთან ერთად საქმეში კიდევ ორი სპეცრაზმელი – გია ფაჩულია და თემურ ჯგერენაია იყვნენ ჩართული.
"მამაჩემის მკვლელობის საქმეში მნიშვნელოვანი მოწმე გამოჩნდა – პოლიციელი გურიკა ქადარია, რომელიც ამბობს, რომ მამაჩემის მკვლელობამდე ცოტა ხნით ადრე მეგის ქარდავამ დაიბარა და გურამ შარაძის მკვლელობის ორგანიზება დაავალა – ქადარია ზუგდიდიდან თბილისში ორ სპეცრაზმელთან ერთად უნდა ჩამოსულიყო, მითითებები მიეღო კუდ-ის მაღალჩინოსან გია დგებუაძისგან ("მასტერა") და შესაბამისად ემოქმედა. სპეცრაზმელები, ვისაც გურამ შარაძე უნდა მოეკლათ, გია ფაჩულია და თემურ ჯგერენაია იყვნენ. ამ საქმისთვის მეგის ქარდავამ გურიკას წინასწარ 5 ათასი დოლარი გადაუხადა. ქადარიას ეს თანხა კოხტა კოდუას (სამეგრელო- ზემო სვანეთის სამხედრო პოლიციის დეპარტამენტის მე-2 რეგიონული სამმართველოს ყოფილი უფროსი) ბიძამ გადასცა. მკვლელობის იარაღიც თავად კოხტა კოდუამ მისცა ქადარიას, თუმცა ამ უკანასკნელმა მკვლელობაში მონაწილეობის თავიდან ასაცილებლად ავადმყოფობა მოიმიზეზა და ამის"დასადასტურებლად" ზუგდიდის სამედიცინო კლინიკას მიმართა",- აცხადებს რუსუდან შარაძე.
შარაძის განმარტებით, ამის შემდეგ მეგის ქარდავამ და პოლიციის სხვა მაღალჩინოსნებმა "ურჩი პოლიციელის" "ჭკუაზე მოყვანა" გადაწყვიტეს – სამხარეო პოლიციაში გამოკეტეს და დაუწყეს დამუშავება.
"ქადარიას ემუქრებოდნენ და მასზე ზეწოლისთვის სხვადასხვა ბინძურ ხერხს მიმართავდნენ ლაშა ექონია, ზაზა ხასაია და გურიკა ჭითანავა, ეს სწორედ ის გურიკა ჭითანავაა, რომელიც გასულ წელს სამეგრელოს სამალავებში წამებისა და გაუპატიურების ცნობილი კადრების აღმოჩენის შემდეგ დააკავეს. შარაძის მკვლელობის საქმეში სწორედ ის დანაშაულებრივი ჯგუფი იყო გარეული, რომელსაც სახელისუფლებო ვერტიკალი შესანიშნავად აკონტროლებდა. წნეხში მოქცეულმა ქადარიამ სცადა, ზემდგომი დაერწმუნებინა, რომ დავალების შეუსრულებლობა, მართლაც, ჯანმრთელობის მდგომარეობის გაუარესებით იყო განპირობებული",- აცხადებს რუსუდან შარაძე.
შარაძის თქმით, ჯანმრთელობის მდგომარეობის შესახებ ინფორმაციის დამტკიცების შემდგომ მეგის ქარდავამ და სამხარეო პოლიციის იმჟამინდელმა უფროსმა თენგიზ გუნავამ ერთგულების დასამტკიცებლად ქადარიას მისივე ნათესავისთვის ნარკოტიკული ნივთიერების ჩადება და დაკავება მოსთხოვეს. მეგის ქარდავას განცხადებით, ამ ქმედებით ის ქადარიას ერთგულებაში დარწმუნდებოდა.
"ქადარიამ იქვე (თენგიზ გუნავას კაბინეტში) უარი თქვა ამ ბრძანების შესრულებაზე. ამის საპასუხოდ გუნავა ფიზიკურად გაუსწორდა მას, რის შემდეგაც გურიკა ქადარიას საცხოვრებელ სახლში სამხარეო პოლიციამ სპეცოპერაცია ჩაატარა. ქადარია ისევ სასტიკად სცემეს, სახლი გაუჩხრიკეს და სწორედ ის ცეცხლსასროლი იარაღი "აღმოუჩინეს", რომელიც თავის დროზე მამაჩემის მოსაკლავად თვითონვე მისცეს",- აღნიშნა რუსუდან შარაძემ.
შარაძის განცხადებით, მას შემდეგ კი რაც მკვლელობის შემკვეთები დარწმუნდნენ, რომ ქადარია გურამ შარაძის ლიკვიდაციის შესახებ ინფორმაციას არ გასცემდა, გაათავისუფლეს. "გურიკა ქადარიამ მეგის ქარდავას წინასწარ აღებული 5 ათას დოლარი დაუბრუნა. ქადარია თბილისში უნდა ჩამოსულიყო და მთავარ პროკურატურაში ჩვენება მიეცა, თუმცა მოულოდნელად ავარიაში მოყვა. როგორც შევიტყვეთ, თემურ ჯგერენაია (მეტსახელად "ჯგერე" ), სპეცრაზმელი, რომელსაც ასევე მონაწილეობა უნდა მიეღო აღნიშნულ მკვლელობაში, ცოტა ხნის წინ უკრაინაში გარკვეულ ვითარებაში გარდაიცვალა. მეორე სპეცრაზმელი კი გია ფაჩულია, შსს-ს დაქვემდებარებაში არსებული აფხაზეთის სპეცდანიშნულების რაზმის ხელმძღვანელის მოადგილეა",- განაცხადა რუსუდან შარაძემ.
გურამ შარაძის ქალიშვილის თქმით, მისი მამის მკვლელობა წინასწარ დაგეგმილი იყო და დემონსტრაციულად, ყველას დასანახად უნდა მომხდარიყო, რადგან მისივე თქმით, ყოფილ ხელისუფლებას აწყობდა ისეთი ავტორიტეტული ფიგურის სახალხოდ დასჯა, რომელიც "თურქი – მესხების" ჩამოსახლებასა და ეროვნული საგანძურის გატანას ეწინააღმდეგებოდა. შეგახსენებთ, რომ გურამ შარაძე 2007 წლის 20 მაისს თბილისის ცენტრში მოკლეს.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.