შეერთებული შტატების სამხედრო ვეტერანს, რომელმაც დალასში ჩასაფრებული მდგომარეობიდან პოლიციის 5 ოფიცერი მოკლა და 7 კი დაჭრა, უფრო დიდი თავდასხმის გეგმა ჰქონდა, განაცხადეს ხელისუფლების წარმომადგენლებმა კვირას. ამის შესახებ "როიტერსი" წერს.

დალასის პოლიციის ხელმძღვანელის დევიდ ბრაუნის თქმით, 25 წლის მაიკ ჯონსონის სახლის ჩხრეკისას აღმოჩნდა, რომ იგი ასაფეთქებელი მოწყობილობების გამოყენების პრაქტიკას გადიოდა. როგორც მან აღნიშნა, სამხილები იძლევა იმის თქმის საშუალებას, რომ მას აღნიშნული მასალების კანონის საწინააღმდეგოდ გამოყენება უნდოდა.

"ჩვენ დარწმუნებული ვართ, რომ ეჭვმიტანილს სხვა გეგმები ჰქონდა", თქვა მან და დაამატა, რომ გასულ კვირას პოლიციის მიერ ლუიზინასა და მინესოტაში ორი შავკანინაინი მამაკაცის მკვლელობამ, 25 წლის ტეხასელ ვეტერანს მხოლოდ დააჩქარებინა მისი თავდასხმის გეგმები.

ჯონსონმა, შავკანიანმა ვეტერანმა, რომელიც ავღანეთში მსახურობდა, დალასში სპონტანურად გამართული საპროტესტო აქციით ისარგებლა და პოლიციელების სროლისთვის შესაფერისი დრო და ადგილი შეარჩია. როგორც ბრაუნმა განაცხადა, სანამ ბომბით აღჭურვილი რობოტით მოკლავდნენ, ჯონსონი მღეროდა, იცინოდა და მასხრად იგდებდა ოფიცრებს, ეუბნებოდა მათ, რომ მას უნდოდა "თეთრკანიანი ადამიანების მოკვლა", იმის სამაგიეროს მისაზღვევად, რომ პოლიციელებმა შავკანიანი მამაკაცები მოკლეს. "ჩანდა, რომ ის თავს ძალიან კარგად აკონტროლებდა და ძალიან გაბედული და მტკიცე იყო ზიანი მიეყენებინა სხვა ოფიცრებისთვის", განაცხადა დალასის პოლიციის ხელმძღვანელმა.