ექიმები გვაფრთხილებენ, რომ უშაქრო საღეჭი რეზინის ზედმეტი მოხმარება შესაძლებელია, წონის დიდი დანაკარგისა და დიარეის მიზეზი გახდეს.

დაავადების სათავე, სარბიტოლია, ე.წ შაქრის ალკოჰოლი, ხელოვნური დამატკბობელი, რომელიც ფართოდაა გამოყენებული საღეჭ რეზინებსა და ტკბილეულობაში და რომელიც ფაღარათის გამომწვევი გახლავთ. აღნიშნულ ინფორმაციას BBC ავრცელებს.

ბრიტანულ სამედიცინო გამოცემაში ექსპერტებმა იმ ორი პაციენტის მაგალითი მოიყვანეს, რომელნიც ავად მას შემდეგ გახდნენ, რაც დღეში დაახლოებით 20 ერთეული საღეჭი რეზინი მოიხმარეს.

სარბიტოლის მწარმოებელი კომპანიის წარმომადგენლის განცხადებით, მათი წარმოებული პროდუქტი უსაფრთხოა და შეფუთვაზე მითითებულია გაფრთხილება მისი ჭარბი მოხმარების თაობაზე.

სარბიტოლი ფართოდაა გამოყენებული უშაქრო საკვებში, მათ შორის იმ პროდუქტებშიც, რომელიც დიაბეტით დაავადებული ადამიანებისთვისაა განკუთვნილი.

იგი ასევე გამოიყენება, როგორც საფაღარათო საშუალება, მაგრამ საღეჭი რეზინის შეფუთვასა და სხვა პროდუქტებზე ამის გამაფრთხილებელი წარწერები არ არის გაკეთებული. ამიტომ ბევრი მომხმარებელი ვერ აცნობიერებს, რომ ამგვარი პროდუქტების დიდი ოდენობით მოხმარება მუცლის პრობლემებს იწვევს, აცხადებენ გერმანელი მკვლევარები.

ერთ-ერთი 21 წლის ქალი 8 თვის განმავლობაში იტანჯებოდა დიარეითა და მუცლის ტკივილებით და უამრავი შემოწმების ჩატარების მიუხედავად, ვერ დადგინდა მისი დაავადების გამომწვევი ნამდვილი მიზეზი მანამ, სანამ ექიმებმა არ გააცნობიერეს, რომ დიარეა საღეჭი რეზინის სისტემატური მოხმარების შედეგი იყო.

ამ გოგომ 8 თვის განმავლობაში 11 კილოგრამი დაიკლო და ძალიან გახდა.

მეორე შემთხვევაში კი მამაკაცი, რომელიც კუჭის აშლილობით იტანჯებოდა და რომელმაც 1 წლის განმავლობაში 22 კილოგრამი დაიკლო, საბოლოოდ საავადმყოფოში მოათავსეს.

მას შემდეგ, რაც პაციენტებმა სარბიტოლის შემადგენლობის პროდუქტებზე უარი თქვეს, მათი სიმპტომები გაუჩინარდა და დაიბრუნეს ის წონა, რომელიც დაკარგეს.

წყარო: http://news.bbc.co.uk/2/hi/health/7180800.stm