სირიაში დღეიდან საომარი მოქმედებების შეწყვეტის შესახებ შეთანხმება ამოქმედდა.

რუსეთმა და შეერთებულმა შტატებმა აღნიშნულის შესახებ მიმდინარე წლის 9 სექტემბერს გამოაცხადეს.

როგორც BBC წერს, გეგმის თანახმად, სირიის მთავრობა დაასრულებს საბრძოლო მისიას იმ ზუსტად განსაზღვრულ ადგილებში, რომელიც ოპოზიციას უკავია.    

რუსეთი და შეერთებული შტატები დააფუძნებენ ერთობლივ ცენტრს, რათა ებრძოლონ ე.წ. ისლამური სახელმწიფოსა და ალ ნურსას მებრძოლებს.    

განცხადებები ამის თაობაზე შეერთებული შტატების სახელმწიფო მდივან ჯონ ქერისა და მის რუს კოლეგას, სერგეი ლავროვს შორის ჟენევაში, პარასკევს გამართული მოლაპარაკებების შემდეგ გაკეთდა.    

ქერის განცხადებით, გეგმის განხორციელებისთვის საჭირო იქნება, რეჟიმმაც და ოპოზიციამაც „დააკამაყოფილონ ვალდებულებები“.

მისი თქმით, ოპოზიციამ აჩვენა, რომ მზად არის შეასრულოს გეგმა.    

ლავროვმა აღნიშნა, რომ რუსეთმა სირიის მთავრობას მიაწოდა ინფორმაცია შეთანხმებების შესახებ და სირიის მთავრობამ გამოხატა მზადყოფნა „განახორციელოს ისინი“. შეთანხმება ასევე ითვალისწინებს ჰუმანიტარულ ხელმისაწვდომობას.    

„საომარი მოქმედებების შეწყვეტა საჭიროებს ალყაში მოქცეულ და ძნელად მისაწვდომ ყველა ადგილებში, მათ შორის ალეპოში, შესვლის ხელმისაწვდომობას“, - განაცხადა ქერიმ.    

საომარი მოქმედებების შეწყვეტიდან 7 დღეში, რუსეთი და შეერთებული შტატები დააფუძნებენ „ერთობლივი განხორციელების ცენტრს“ იმისათვის, რომ ებრძოლონ ისლამური სახელმწიფოს დაჯგუფებისა და ალ ყაიდას მოკავშირე ნურსას მებრძოლებს.    

ლავროვმა განაცხადა, რომ ერთობლივი განხორციელების ცენტრი საშუალებას მისცემს რუსეთის და შეერთებული შტატების ძალებს „გამოაცალკევონ ტერორისტები ზომიერი ოპოზიციისაგან“.    

მან თქვა, რომ რუსეთის და შეერთებული შტატების საჰაერო ძალები ტერორისტების წინააღმდეგ კოორდინირებულ დარტყმებს განახორციელებენ და აღნიშნული დარტყმები მოხდება ისეთ ადგილებშიც, სადაც სირიის საჰაერო ძალების მიერ ეს გამორიცხული იყო.    

„ჩვენ შევთანხმდით იმ ადგილმდებარეობებზე, სადაც მსგავსი კოორდინირებული დარტყმები განხორციელდება, და იმ ადგილებზე - რასაც ნეიტრალური შეთანხმებით ასევე სირიის მთავრობაც იზიარებს - სადაც მხოლოდ რუსული და ამერიკული საჰაერო ძალები იქნებიან ფუნქციონალური“, - განაცხადა ლავროვმა. 

მაგრამ მან დაამატა, რომ „სირიის საჰაერო ძალები ფუნქციონალური იქნება სხვა ადგილებში, იმის გარეთ, რომელიც ჩვენ ამოვარჩიეთ რუსულ-ამერიკული სამხედრო თანამაშრომლობისთვის“.