ისრაელის პრემიერ მინისტრი ბენიამინ ნეთანიაჰუ ისრაელის 69–ე დამოუკიდებლობის დღისა და ისრაელი–საქართველოს დიპლომატიური ურთიერთობების 25–ე იუბილეებს ეხმაურება და საქართველოში ისრაელის საელჩოს მისალოც წერილს უგზავნის.

წერილში აღნიშნულია, რომ ებრაელ და ქართველ ხალხებს შორის მეგობრობა ის ფუნდამენტია, რაზეც აშენდა და განვითარდა პარტნიორობა ორ ქვეყანას შორის ბოლო მეოთხედი საუკუნის განმავლობაში - „ქართველი ებრაელების მრავალრიცხოვანმა თემმა ისრაელში სხვა ელფერი შემატა ჩვენს შორის არსებულ განსაკუთრებულ ურთიერთობებს“.

„ჩემთვის დიდი პატივია, მოგესალმოთ იერუსალიმიდან ისრაელის საელჩოს მიღებაზე, რომელიც ისრაელის 69–ე დამოუკიდებლობის დღისა და ისრაელი–საქართველოს დიპლომატიური ურთიერთობების 25–ე იუბილეებს ეძღვნება.

როდესაც ვუყურებ, რას მიაღწია ისრაელმა 7 ათწლეულზე ნაკლებ დროში, გული სიამაყით მევსება. ჰოლოკოსტის კოშმარით დამფრთხალი, დაუცველი და დევნილი ხალხიდან მძლავრ, თავისუფალ და თანამედროვე დემოკრატიად ჩამოყალიბება კაცობრიობის ისტორიაში უპრეცედენტო შემთხვევაა. დღესდღეობით ისრაელს კუთვნილი ადგილი აქვს დამკვიდრებული გლობალურ არენაზე როგორც ინოვაციების, წარმოებისა და ტექნოლოგიების განვითარების ლიდერს.ისრაელის წვლილი კაცობრიობის წინაშე ჩვენს მოცულობას ბევრად აღემატება.

ისრაელს ყველაზე დიდი სასწაული ისაა, რომ ყოველივე ამას მივაღწიეთ მტრების განმეორებითი მცდელობების მიუხედავად, გაეცამტვერებინათ ებრაული სახელმწიფო. ისრაელს არასოდეს მიუტოვებია მშვიდობისა და მეზობლების შემორიგების იმედი და ჩვენ, როგორც არასდროს, ამ საბოლოო მიზნის ერთგულნი ვრჩებით.

წლეულს ასევე აღინიშნება ისრაელს და საქართველოს შორის დიპლომატიური ურთიერთობის დამყარების 25 წლის იუბილე. ებრაელ და ქართველ ხალხებს შორის მეგობრობა ის ფუნდამენტია, რაზეც ავაშენეთ და განვავითარეთ პარტნიორობა ორ ქვეყანას შორის ბოლო მეოთხედი საუკუნის განმავლობაში. ქართველი ებრაელების მრავალრიცხოვანმა თემმა ისრაელში სხვა ელფერი შემატა ჩვენს შორის არსებულ განსაკუთრებულ ურთიერთობებს. ისრაელი საქართველოს მნიშვნელოვან პარტნიორად მიიჩნევს ისეთ სფეროებში, როგორებიცაა ვაჭრობა, კულტურა, განათლება, ტურიზმი და უსაფრთხოება. ჩემი მთავრობა ქართველ კოლეგებთან მჭიდრო თანამშრომლობის ერთგული რჩება“, ნათქვამია ისრაელის პრემიერ მინისტრის, ბენიამინ ნეთანიაჰუს მისალოც წერილში.

საქართველოში ისრაელის საელჩოს ორგანიზებით, ისრაელის სახელმწიფოს დამოუკიდებლობის 69 წლისთავის და საქართველო-ისრაელს შორის დიპლომატიური ურთიერთობების დამყარების 25 წლისადმი მიძღვნილი საზეიმო მიღება გაიმართა ჯანსუღ კახიძის სახელობის თბილისის მუსიკალურ-კულტურულ ცენტრში. საზეიმო მიღების შემდეგ კი, კონცერტი ჩატარდა.