აზიური ფაროსანას საწინააღმდეგო ღონისძიებები აქტიურად მიმდინარეობს. ვანის მუნიციპალიტეტში, დღეიდან მობილიზებული იქნება 7 ერთეული მაღალი გამავლობის სპეციალიზებული ტექნიკა შესაწამლი აგრეგატებით, მათ შორის 4 თერმული ნისლის აგრეგატი, 2 ცივი შესხურების ტექნიკა და 1 სატრაქტორე აგრეგატი იქნება.

ვანის მერიის პრესსამსახურის ცნობით, მუნიციპალიტეტის მასშტაბით, შეიწამლება და თერმული ნისლის ტექნოლოგიით დამუშავდება სახელმწიფოს საკუთრებაში არსებული ტერიტორიები, სოფლების ტერიტორიები, სადაც აუცილებელია სპეციალიზებული ტექნიკის გამოყენება. ტყისპირა ზოლებში მოხდება „მოიზიდე და გაანადგურე“ სადგურების გამოყენება, რათა აღიკვეთოს ტყიდან მავნებლის გავრცელება დასახლებულ ტერიტროიებზე. ფაროსანას წინააღმდეგ ბრძოლის გეგმა და საბოლოო ინსტრუქციები ვანის მუნიციპალიტეტის სოფლებში მერის წარმომადგენლებს და ადგილობრივი ხელისუფლების წევრებს სურსათის ეროვნული სააგენტოს და ფაროსანას წინააღმდეგ ბრძოლის საკოორდინაციო შტაბის ხელმძღვანელმა პირებმა გააცნეს.

შტაბის კოორდინატორის, ლაშა შალამბერიძის განმარტებით, 7 ერთეული ტექნიკა უშალოდ ვანის მუნიციპალიტეტისთვის არის გამოყოფილი, თუმცა საჭიროების შემთხვევაში გამოიყოფა დამატებითი ტექნიკა.

„ჩვენ უახლოეს დღეებში დავიწყებთ შეწამლვის პროცესს. მივალთ ყველა სოფელში, პირველ ეტაპზე კი მონიტორინგის საფუძველზე გამოვლენილ ტერიტორიებზე, სადაც მავნებლის ინტენსიური გავრცელება ფიქისრდება“, განაცხადა შალამბერიძემ.

შეწამვლითი სამუშაოების დაწყებამდე 24 საათით ადრე, წინასწარ ეცნობება სოფლის მოსახლეობას, სამუშაოები ვანში 30 აპრილს დაიწყება და მუნიციპალიტეტს ეტაპობრივად მოიცავს.