საგარეჯოს მუნიციპალიტეტის სოფელ ლამბალოს საჯარო სკოლა 40-მდე მე-12 კლასელმა დაამთავრა, მათი სკოლიდან გაცილება კი მოკრძალებულად აღინიშნა, - განუცხადა ლამბალოს აზერბაიჯანულენოვანი საჯარო სკოლის დირექტორმა, დავით როსტომაშვილმა GUARDIAN.GE-ის.

„მოგეხსენებათ, პანდემიიდან გამომდინარე დაწესებული რეგულაციების გამო, უკვე მეორე წელია ვერ ვახერხებთ მე-12 კლასელებისთვის ბოლო ზარის ღონისძიების მოწყობას. წელს ისინი მოკრძალებულად გავაცილეთ სკოლიდან. სპორტდარბაზში 15-20 წუთი შევიკრიბეთ და მივულოცეთ სკოლის დამთავრება. წელს 40-მდე მე-12 კლასელმა დაამთავრა ლამბალოს საჯარო სკოლა. ამდენი კურსდამთავრებული კარგა ხანია არ გვყოლია. წარმატებას ვუსურვებ მათ. მჯერა, რომ არაერთი მათგანი იქნება წარმატებული“, უთხრა GUARDIAN.GE-ის დავით როსტომაშვილმა.

დირექტორის თქმით, მე-2 სემესტრის განახლების შემდეგ სკოლაში პედაგოგების და ადმინისტრაციული პერსონალის ტესტირებები ინტენსიურად ტარდება და კორონავირუსის შემთხვევები ამ დრომდე არ დადასტურებულა.

„რეგულარულად, პროტოკოლის მიხედვით, ყოველ 2 კვირაში ერთხელ, ჩვენი სკოლის თანამშრომლებს უტარდებათ ტესტირება. მედიკოსები ადგილზე მოდიან და აქ ატარებენ ტესტირებას. საბედნიეროდ, ჩვენთან, დღემდე არ გამოვლენილა ვირუსი. დიდი სკოლაა, 1200-ზე მეტი მოსწავლე სწავლობს, შესაბამისად, პედაგოგების რაოდენობაც დიდია, მაგრამ რეგულაციების დაცვამ, როგორც ჩანს, თავისი შედეგი გამოიღო და ვირუსი არც ერთ ტესტირებულს არ დადასტურებია. ვფიქრობ, 15 ივნისს, საკლასო ოთახებში დავასრულებთ 2020-21 სასწავლო წელს“, განუცხადა დავით როსტომაშვილმა GUARDIAN.GE-ის.