GUARDIAN.GE - „ქართული ოცნების“ ყოფილი დეპუტატი გედევან ფოფხაძე აცხადებს, რომ დღეს მართლმადიდებელი ეკლესიის მთავარი მტერი, „აგრესიული ათეისტი“, ბიძინა ივანიშვილია, რომელსაც „არა უბრალოდ ღმერთის არ სწამს, არამედ აღიზიანებს ის ხალხი, ვისაც ღმერთის სწამს“.

როგორც მან „მთავარი არხის“ ეთერში განაცხადა, ივანიშვილი დღემდე ვერ ინელებს იმას, რომ მარიხუანას კულტივაციის შესახებ კანონპროექტის ჩაგდებაში მას ეკლესიამ შეუშალა ხელი. გედევან ფოფხაძის განცხადებით, ივანიშვილმა უმრავლესობის ერთ-ერთ სხდომაზე თავად განაცხადა, რომ კანონპროექტზე უარის თქმით, იგი 2 მილიარდს კარგავდა.

„იდეოლოგიური, ღირებულებითი კონფლიქტია მასსა და პატრიარქს შორის და მასსა და მართლმადიდებლურ ეკლესიას შორის და საერთოდ, მორწმუნე ხალხს შორის. ყოველთვის ხაზს ვუსვამ, რომ ბიძინა ივანიშვილი არის აგრესიული ათეისტი. ჩვეულებრივი ათეისტისაგან განსხვავებით, აგრესიულ ათეისტს არა უბრალოდ ღმერთის არ სწამს, არამედ აღიზიანებს ის ხალხი, ვისაც ღმერთის სწამს. და მე მქონდა ეს კამათი ბიძინა ივანიშვილთან უმრავლესობის სხდომაზე, როდესაც გამომიცხადა, რომ როცა პარლამენტის შენობაში შედიხარო, შენ შენი რელიგიური შეხედულებები კარებთან უნდა დატოვოო. მე ვუთხარი, ეს პიჯაკი არ არის, გავიხადო, დავტოვო და ისე შევიდე და მერე ჩავიცვა, რომ გამოვალ-მეთქი. მას ეს აგრესია ჰქონდა და ამ აგრესიამ განსაკუთრებული პოლიტიკური ხორცი შეისხა მას შემდეგ, რაც მოინდომა მარიხუანას კულტივაციის კანონპროექტის გატანა. ეს კანონპროქეტი 2 მილიარდ დოლარს თუ ლარს... ის საუბრობდა 2 მილიარდზე, საუბრობდა, რომ 2 მილიარდი უნდა ვიშოვო და თქვენ და მორწმუნე ხალხი და ეკლესია არ მაძლევთ მაგის უფლებას. უმრავლესობის სხდომაზე, ჩემს გარდა 60 კაცი იყო კიდევ და იმედია, ვიღაცა ისინდისებს. იქ ძალიან აქტიურობდა ზვიად ძიძიგური, მირიან წიკლაური. მე გამოვრიცხავ, რომ იმ ადამიანებმა, ვინც იქ იყვნენ და ამ კამათს უსმენდნენ, ყველამ დაივიწყოს ეს შინაარსი. მთავარი ფიგურა იყო გახარია, მან შემოიტანა ეს კანონპროექტი, შინაგან საქმეთა მინისტრობის დროს, დაავალეს... გახარიას პრემიერობა გავიდა სამ თემაზე - ეს იყო სამეგრელოს დარბევა წინასაარჩევნოდ; ეს იყო მარიხუანას კულტივაცია და ეს იყო მიტინგის დარბევა - ამ სამი „დამსახურების“ გამო გახდა მაგი პრემიერი. ახლა კაი საქმეს აკეთებს და მე მაინც ვამბობ, რომ გახარია ჩვენი მოკავშირეა“, - განაცხადა გედევან ფოფხაძემ და დაამატა:

„მე ხაზს ვუსვამ იმას, რომ ეკლესიამ რომ ლუკმა ამოაცალა, ეს 2 მილიარდი რომ ამოაცალა ბიძინა ივანიშვილს, ბიძინა ივანიშვილს ეს მონელებული არ აქვს და ის არის დღეს ჩვენი მორწმუნე ხალხის და მართლმადიდებელი ეკლესიის მთავარი მტერი“.