პარლამენტის იურიდიულ საკითხთა კომიტეტის თავმჯდომარე კომპანია „Qnet"-თან მის კავშირზე „რუსთავი 2"-ის მიერ მომზადებულ სიუჟეტს ეხმაურება. ეკა ბესელია აღნიშნულ კომპანიასთან კავშირს უარყოფს და აცხადებს, რომ „რუსთავი 2"-ის ჟურნალისტმა და ifact-ის წარმომადგენელმა არასწორი ინფორმაცია განზრახ გაავრცელეს.

ბესელია სოციალურ ქსელში წერს, რომ მომხდართან დაკავშირებით, ხვალ საჩივრით ჟურნალისტური ეთიკის ქარტიას, ხოლო ამის შემდეგ სასამართლოს მიმართავს.

„ვეხმიანები ტელეკომპანია „რუსთავი 2"-ის შაბათის კურიერში გასულ სიუჟეტს, სადაც „რუსთავი2"-ის ჟურნალისტმა და ifact-ის წარმომადგენელმა გაავრცელეს განზრახ ცრუ, ცილისმწამებლური და საზოგადოების შეცდომაში შემყვანი ინფორმაცია. კერძოდ, მე დამაკავშირა კომპანია „Qnet"-თან და მის საქმიანობასთან, რაც არის სრული სიცრუე.

მიუხედავად იმისა, რომ ამის თაობაზე ვაცნობე გადაცემის წამყვან ჟურნალისტს, მან განზრახ გაავრცელა არასწორი ინფორმაცია.

ამ კომპანიასთან არასოდეს მქონია და არ მაქვს არანაირი ურთიერთობა და მოვითხოვ გავრცელებული არასწორი ინფორმაციის გამო იმსჯელოს ჟურნალისტთა ეთიკის ქარტიამ, რომელსაც მივმართავ ხვალ საჩივრით.

ხოლო შემდგომ, გავრცელებული ცილისმწამებლური ინფორმაციების გამო მივმართავ სასამართლოს „რუსთავი 2"-ის და ჟურნალიტთა ჯგუფის ifact-ის წინააღმდეგ", წერს ეკა ბესელია სოციალურ ქსელში.