„ეროვნულ-დემოკრატიული პარტიის“ თავმჯდომარე და „ძალა ერთობაშია“-ს საპრეზიდენტო კანდიდატი, გრიგოლ ვაშაძის მხარდამჭერი ბაჩუკი ქარდავა გაუგონარს უწოდებს ხელისუფლების იმ ნაბიჯებს, რომელიც გაერთიანებული ოპოზიციის საპრეზიდენტო კანდიდატის მხარდამჭერთა სიების ცესკოში წარდგენას მოჰყვა.

„ცესკო-ს მართავს არა თამარ ჟვანია, არამედ, თამარ ჟვანიას მართავს სუსი. ამ რეალობის წინაშე ვდგავართ და ხელისუფლება ცდილობს, დარწმუნებული იმაში, რომ ის მარცხდება ამ არჩევნებში, არასოდეს რომ არ გაგონილა სიების ხელმოწერების შეგროვებასთან დაკავშირებით, პირველად გავიგე რომ ხელისუფლება ოპოზიციის წინააღმდეგ ახორციელებდა შეტევას“, განაცხადა „რუსთავი 2“-თან საუბრისას ბაჩუკი ქარდავამ.

„ევროპული საქართველოს“ პოლიტიკური საბჭოს წევრის, ბესო დონაძის თქით კი, მისი სახელი და გვარი და ყალბი ხელმოწერები სამჯერ იყო დაფიქსირებული ერთ-ერთი ოპოზიციური საპრეზიდენტო კანდიდატის მხარდამჭერთა სიაში და მას ცესკოდან დაურეკეს ახსნა-განმარტებისთვის, სადაც დაადასტურა, რომ ხელმოწერა მას არ ეკუთვნის, ხოლო პროკურატურაში განცხადება მას არ შეუტანია.

რამდენიმე დღის წინ, ცესკომ „ძალა ერთობაშია“-ს საპრეზიდენტო კანდიდატის, გრიგოლ ვაშაძის მხარდამჭერთა სიებში არაერთი ყალბი, მათ შორის პრემიერ მინისტრის, მამუკა ბახტაძის ხელმოწერა აღმოაჩინა და საკითხი შესასწავლად პროკურატურას გადაუგზავნა.