სააკაშვილი-ნათელაშვილის ფარული თანამშრომლობის შესახებ, დღეს უკვე ღიად საუბრობს პოლიტიკური პარტია „მემარცხენე ალიანსის“ ლიდერი, სოსო შატბერაშვილი, რომლის განცხადებით, შალვა ნათელაშვილმა სააკაშვილის დაფინანსებით ბაზალეთზე 5 მილიონ დოლარად ღირებული სასახლე აიშენა. მეტიც, შატბერაშვილი აცხადებს, რომ მიხეილ სააკაშვილმა ავსტრიის დედაქალაქში, ვენაში, ნათელაშვილს  7-ოთახიანი დუპლექსის ტიპის ბინა უყიდა. დაინტერესების შემთხვევაში, შატბერაშვილი მზად არის, პროკურატურას მტკიცებულებები წარუდგინოს, თუმცა, მანამდე, for.ge დაინტერესდა პირველი ლეიბორისტის პოლიტიკური ინტრიგებით, რაზეც მისი პარტიის ერთ-ერთი ყოფილი ლიდერი, სოსო შატბერაშვილი გვესაუბრა.

სოსო შატბერაშვილი: შალვა ნათელაშვილს ბაზალეთში აქვს მამისეული სახლი, თუმცა, გვერდით აიშენა ახალი სასახლე. როდესაც ის აცხადებს, რომ ეს არის ჩემი მამა-პაპისეული სახლი, არ არის სწორი. მამა-პაპისეული სახლის გვერდით აიშენა სრულიად ახალი სახლი იმ ფულით, რომლითაც დააფინანსა მიხეილ სააკაშვილმა. ეს სახლი 5 მილიონ დოლარად არის შეფასებული.

რა ინტერესი გააჩნდა სააკაშვილის, რომ დაეფინანსებინა ნათელაშვილი, რომელიც ღიად იყო დაპირისპირებული მასთან ყოველ შემთხვევაში, ასე იცოდა საზოგადოებამ...

- ჩვენ ვიყავით შეურიგებელი ოპოზიცია, მაგრამ, სამწუხაროდ, ჩვენს ზურგს უკან მოხდა სააკაშვილთან გარიგება. მას შემდეგ, რაც ბიძინა ივანიშვილი შემოვიდა პოლიტიკაში, გაირკვა, რომ ივანიშვილის ლანძღვა და მასთან დაპირისპირება ძალიან უღირდა სააკაშვილს და ჩვენს ზურგს უკან დაიწყო ნათელაშვილის დაფინანსება. დამფინანსებელიც გავარკვიეთ, ეს გახლავთ ისრაელის მოქალაქე, ანატოლი მოტკინი.

ვინ არის ანატოლი მოტკინი?

- ის არის თაღლითი ადამიანი. ფულად ურთიერთობებში არის შუამავალი. ნათელაშვილმა არც დამალა, რომ ანატოლი მოტკინს მოჰქონდა მასთან ფული. პირველად ავსტრიაში მიუტანა ფული, შემდეგ უკვე, 2011-2012 წლებში ეს პიროვნება სისტემატიურად მოდიოდა ჩვენთან ოფისში და მოჰქონდა ფული, ხოლო ნათელაშვილის ანგარიშებზე გაჩნდა ექვსნიშნა ციფრიანი თანხები, რომელიც ჩვენ გამოვაქვეყნეთ.

როდესაც ამბობთ, რომ ფული მოჰქონდა, თქვენ ამის თვითმხილველი ხართ?

- ამის თვითმხილველი ვიყავით ყველა. მოტკინს ტყავის ჩანთით დაჰქონდა ფული. შალვა ნათელაშვილმა თქვა, რომ ვიპოვე დამფინანსებელი და მადლობას ვუხდი დიდ ებრაელ ხალხს, რადგან ისევ ებრაელებმა დაგვაფინანსეს უანგაროდო. თუმცა, შემდეგ თქვა, რომ თურმე ეს უანგარო, არც მთლად უანგარო ყოფილაო.

რას გულისხმობდა?

- ნათელაშვილმა თქვა, რომ ამ დაფინანსებაში ანატოლი მოტკინი იღებს 30% და ეს არის 2 მილიონიო. სწორედ ამის შემდეგ დაიწო იმ პატარა კოტეჯის თავბრუდამხვევი სისწრაფით, წარმოუდგენელი მასშტაბის მშენებლობა. რაც მთავარია, პარტიაში გაჩნდა ფინანასები, დაიწყო ამ ფულის დარიგება და შემდეგ გავარკვით, რომ თურმე, ეს ყველაფერი მოდის მიხეილ სააკაშვილისგან. როდესაც პოლიტკომიტეტის სხდომა მოვიწვიეთ და პირდაპირ მოვთხოვეთ პასუხი, მან განაცხადა, რომ მაფინანსებს ანატოლი მოტკინი და არ უარვყოფ, შეიძლება, ის ვანო მერაბიშვილის ბიზნეს პარტნიორიც არისო. მას არ უარყვია, რომ კავშირში იყო მერაბიშვილთან. სამწუხაროა, რომ ამით არ ინტერესდება პროკურატურა და ამ ადამიანებს არ იბარებენ პროკურატურაში.

ნათელაშვილის დაკითხვას ითხოვთ?

- დიახ. თქვენი გამოცემის საშუალებით მოვითხოვთ პროკურატურისგან, რომ დაიკითხოს შალვა ნათელაშვილი, ასევე ისრაელის მოქალაქე ანატოლი მოტკინი და მათ შორის ჩვენც.

რაც შეეხება დაფინანსებას, მუდმივად იყო ინფორმაცია, რომ ნათელაშვილი არ იყო რეალურად სააკაშვილთან დაპირისპირებული. ასევე იყო ინფორმაცია, რომ ნათელაშვილი გარკვეული თანხის სანაცვლოდ, საარჩევნო სიებში სვამდა ხალხს. იმ ხანად ამბობდნენ, რომ ფრიდონ ინჯიაც ამ გზით მოხვდა ლეიბორისტების სიაში. გარდა ამისა, ცნობილია, რომ საარჩევნო კამპანიის პერიოდში, სააკაშვილის ხელისუფლება ხელს უწყობდა „ლეიბორისტებს“, რასაც ვერ ვიტყვით სხვა პარტიებზე. თქვენ რა შეგიძლიათ გვითხრათ ამასთან დაკავშირებით?

- იმ პერიოდში, რომელზეც ახლა თქვენ საუბრობთ, პირადად მე და ჩემი თანამებრძოლები არ ვიყავით პარტიის ხელმძღვანელები. მაშინ ჩვენ ვიყავით რეგიონალური კოორდინატორები და არ მიგვიწვდებოდა ხელი ინფორმაციაზე, რა პრინციპით დგებოდა სია. რა თქმა უნდა, ეს ინფორმაციები მოდიოდა ჩვენამდე, მაგრამ არ ვიჯერებდით და არც გვინდოდა დაგვეჯერებინა, თანაც ყოველგვარი საბუთის გარეშე. როდესაც რეალური ფაქტები მოვიპოვეთ, მაშინ მოვიწვიეთ სხდომა და ნათელაშვილს მოვთხოვეთ პასუხი.

რა პასუხი ჰქონდა ნათელაშვილს?

- როდესაც სააკაშვილთან ალიანსის დამადასტურებელი საბუთები დავუდეთ, გვითხრა, რომ ყრილობის მოწვევაც არ გინდათ, გადავდგებიო, მაგრამ მოგავტყუა და არ გადადგა. რადგან არ გადადგა, უმრაველსობამ დავტოვეთ პარტია.

ანუ, თქვენც გაქვთ ინფორმაცია, რომ პარტიული სიის შედგენაში ფულს იღებდა?

- იყო ლაპარაკი, რომ სიაში ჩაწერა ხდებოდა თანხის გამო. მაგრამ, დაუდასტურებელ ინფორმაციას არ ვეყრდნობოდით. საარჩევნო სიაში ჩაწერილი იყო ვინმე თევდორაძე, რომელიც პარტიის წევრი იყო მესხეთ ჯავახეთიდან, 2011 წელს ჩვენთვის ცნობილი გახდა, რომ ეს ბატონი ვანო მერაბიშვილის ნათესავი ყოფილა და მას გაუღია პარტიის დასაფინანსებელი თანხები.

ნათელაშვილი რომ სააკაშილთან არ იყო დაპირისპირებული, ეს ხშირად მისი ქმედებითაც დასტურდებოდა. რადგან ნათელაშვილი უპირისპირდებოდა იმ გუნდს, ან პიროვნებას, რომელსაც ურთერთობა ეძაბებოდა სააკაშვილთან. ამის ერთ-ერთი მაგალითია, ბიზნესმენ ცეზარ ჩოჩელის სახლთან აქციის მოწყობა. ჩვენს ხელთ არსებული ინფორმაციით ეს აქცია დაფინანსებული იყო სააკაშვილის მხრიდან, ანუ მის ინტერესში შედიოდა აქციის გამართვა ჩოჩელის სახლთან. თქვენც ამ აქციის მონაწილე ხართ, რას იტყვით?

- ნამდვილად, მეც ვიყავი ამ აქციის მონაწილე, მაგრამ რა დაფინანსება უნდოდა ცეზარ ჩოჩელის სახლთან ჩატარებულ აქციას. შეიძლება სააკაშვილის მოთხოვნით ჩატარდა და არა მისი დაფინანსებით. 100 ლარზე ძვირი არ დამჯდარა ის აქცია. ჩვენ მოგვიანებით გავარკვიეთ, რომ ნათელაშვილი ნამდვილად ფინანსდებოდა სააკაშვილის მხრიდან, მისი სატელიტი იყო, როგორც დღეს და არ გამოვრიცხავ, რომ მისი ყველა წინა აქცია და აქტიურობა სააკაშვილთან შეთანხმებით ხდებოდა.

ხელისუფლების შეცვლის შემდეგ ნათელაშვილი რამდენჯერმე იმყოფებოდა ოფიციალური ვიზიტით აშშ-ში და გამართა მაღალი დონის შეხვედრები. ნაციონალების მსგავსად, ლეიბორისტების ლიდერიც ამტკიცებს, რომ ქვეყანაში მიმდინარეობს პოლიტიკური დევნა და, რომ ქვეყანას მართავს ოლიგაქრი. ამ შემთხვევაშიც სააკაშილის თამაშს თამაშობს ნათელაშვილი?

- უკვე აღარც არის თამაში. მას გახსნილი აქვს ტელეკომპანია „რუსთავი 2“-ის ეთერი, როგორც საკუთარი ტელეკომპანია. როდესაც ჩვენ მართლა დაპირისპირებული ვიყავით სააკაშვილთან „რუსთავი 2“ ჩვენთვის იყო გადაკეტილი და არც კი გვაშუქებდნენ. ჩვენთვის ღია იყო მხოლოდ „იმედი“, მაგრამ როდესაც დაარბიეს და წაართვეს პატარკაციშვილს, ისიც დაიკეტა. როგორც კი შეეკრა სააკაშვილს, მაშინათვე სააკაშვილის ტელეკომპანიები გაიხსნა მისთვის.

ერთი საინტერესო დეტალის შესახებ მინდა გავაკეთო განცხადება, შალვა ნათელაშვილს ავსტრიის დედაქალაქში ვენაში, 7 ოთახიანი დუპლექსის ტიპის ბინა უყიდა მიხეილ სააკაშვილმა, დღესაც იქ ბრძანდება ნათელაშვილი ოჯახთან ერთად. საზოგადოება შოკში ჩავარდება როდესაც გაიგებს მისი ვოიაჟების შესახებ. ჩვენ დოკუმენტალურად წარვუდგენთ საზოგადოებას როგორ სასტუმროში ცხოვრობდა და რამდენს იხდიდა ნათელაშვილი. ასევე, როგორი ძვირადღირებული ბილეთებით დაბრძანდებოდნენ ის და მისი მეუღლე უცხოეთში.

ძალიან სერიოზულ ბრალდებებს უყნებეთ თქვენი ყოფილი პარტიის ლიდერს. გაქვთ მტკიცებულებები რითიც შეძლებათ ამ ბრალდებების დამტკიცებას?

- რა თქმა უნდა. მინდა, რომ მიჩივლოს კიდეც ნათელაშვილმა, მაგრამ არ მიჩივლებს, რადგან მან ძალიან კარგად იცის, რომ მე მაქვს უტყუარი ინფორმაცია. მინდა, რომ ამ ინფორმაციით დაინტერესდეს პროკურატურა და ჩემი ინტერვიუ ჩათვალოს როგორც განცხადება და დაინტერესდნენ ყველაფერ ამითი, დაიბარონ და დაკითხონ შალვა ნათელაშვილი. ამ საკითხებთან დაკავშირებით, დაახლოებით 2 თვის წინ, გამოვიწვიე სატელევიზიო დებატებში, მაგრამ სრული დუმილია მისი მხრიდან.

თამთა ქარჩავა

წყარო for.ge