„ერთიანი ნაციონალური მოძრაობის“ წევრმა, ბათუმის მერობის ყოფილმა კანდიდატმა, გიორგი კირთაძემ დღეს გამართულ ბრიფინგზე ბათუმის ახალარჩეული საკრებულოს გარდაცვლილ დეპუტატ ნუგზარ ფუტკარაძეზე განხორციელებული ზეწოლის შესახებ ისაუბრა და აღნიშნულის დამადასტურებელი აუდიო ჩანაწერი წარმოადგინა.

გიორგი კირთაძე ნუგზარ ფუტკარძეზე ზეწოლაში აჭარის მთავრობის მეთაურის, თორნიკე რიჟვაძის მამას, დათო რიჟვაძეს და ასლან აბაშიძის მმართველობის დროს ძალოვანი სტრუქტურების მაღალჩინოსნებს, ვაჟა თაბაგიძეს და ბადრი ბაკურიძეს ადანაშაულებს.

„ყველამ ძალიან კარგად იცით, რა შედეგებით დასრულდა ბათუმში ადგილობრივი თვითმმართველობის არჩევნები - „ქართული ოცნება“ გადავიდა ოპოზიციაში, 19 წევრი გაიყვანა ოპოზიციამ, 16 „ქართულმა ოცნებამ“. ამის შემდეგ მოხდა ღარიბაშვილისა და კობახიძის ვიზიტი ბათუმში, რომლებმაც პირდაპირ დაგვიანონსეს და გვითხრეს, რომ მათ არ აინტერესებთ რა გადაწყვიტა ბათუმელმა ამომრჩეველმა, „ქართულ ოცნებას“ აუცილებლად ექნებოდა უმრავლესობა ბათუმის საკრებულოში, რაც გაცხადებულად პირდაპირ ნიშნავდა იმას, რომ საკრებულოს წევრებზე იწყებოდა არნახული მასშტაბის ზეწოლა.

„პირველი, ეს მათ შეძლეს გახარიას პარტიის წარმომადგენლებზე და 18/17-ზე მოახდინეს ბალანსი და უკვე სჭირდებოდათ „ნაციონალური მოძრაობის“ ფრაქციიდან ერთი ადამიანის გადაყვანა იმისთვის, რომ უმრავლესობით ყოფილიყო წარმოდგენილი ბათუმის საკრებულოში „ქართული ოცნება“. ჩვენი ფრაციის სხვადასხვა წევრზე მიმდინარეობდა ზეწოლა, თუმცა ერთ-ერთი პირველი ვისზეც დაიწყო ზეწოლა და მოსყიდვის მცდელობა, ეს გახლდათ ბატონი ნუგზარ ფუტკარაძე, რომელიც რამდენიმე დღის წინ გარდაიცვალა... ბატონ ნუგზართან მოლაპარაკებას დათო რიჟვაძის დავალებით, თორნიკე რიჟვაძის მამის დავალებით, სათავეში ჩაუდგა ასლან აბაშიძის დროინდელი ორი ყოფილი ძალოვანი, მაღალჩინოსანი ძალოვნები. ესენი გახლავთ, ვაჟა თაბაგიძე და ბადრი ბაკურიძე. ვაჟა თაბაგიძე ასლან აბაშიძის დროს იკავებდა აჭარის სამძებროს უფროსის პოზიციას, ხოლო ბადრი ბაკურიძე იკავებდა ბათუმის უშიშროების უფროსის პოზიციას. ორივე მათგანს აჭარის რევოლუციის შემდეგ მოუწია აჭარიდან წასვლა და მხოლოდ ივანიშვილის ხელისუფლებაში მოსვლის შემდეგ დაბრუნდნენ ისინი ჩვენს ქალაქში. მათ არაერთი შეხვედრა გამართეს ნუგზარ ფუტკარაძესთან. ამის შესახებ საქმის კურსში ვიყავით, ბატონი ნუგზარი პირადად მე მაყენებდა საქმის კურსში ამ შეხვედრების შესახებ და მაშინ, როცა ეს უკვე გაუსაძლის ხასიათს იძენდა, ბატონმა ნუგზარმა თვითონვე გააკეთა ჩანაწერები, დარწმუნებული ვარ, მეორე მხარეც ამ ჩანაწერებს აკეთებდა, და ეს ჩანაწერები მომაწოდა პირადად მე. ჩანაწერები არის აუდიო სახის და მასში კარგად ჩანს, როგორ სთავაზობდა ვაჟა თაბაგიძე - რომელიც ამავდროულად არის ზაზა დიასამიძის, ხელვაჩაურის მერად არჩეულის, ძველი პოლიციელის ბიძა და ასევე მისი სახელი და გვარი ძალიან კარგად ისმის, რომ მისი სახელითაც არიან მისულები, ბატონ ნუგზართან და ბადრი ბაკურიძე - როგორ სთავზობდნენ მას 100 ათას დოლარს და 20%-ს სანაცვლოდ სთხოვდნენ უკან. პირადად დათო რიჟვაძე ხელმძღვანელობდა ამ ყველაფერს“, განაცხადა გიორგი კირთაძემ და ბრიფინგზე აუდიო ჩანაწერი წარმოადგინა.

კირთაძის თქმით, ნუგზარ ფუტკარაძე მასზე ზეწოლის გამო, ნერვიულობის შედეგად გარდაიცვალა.

„ზეწოლა ბატონ ნუგზარზე ბევრად ადრე დაიწყო. ეს ჩანაწერი მოგვიანებითა არის გაკეთებული და სწორედ ამიტომაც, 5 ნოემბერს, ჩვენ ასე ყველანი ერთად შევიკრიბეთ და გავაკეთეთ განცხადება, მოვუწოდეთ დათო და თორნიკე რიჟვაძეებს, თავი დაენებებინათ ჩვენი ფრაქციის წევრებისთვის. ოდნავ მაინც რომ მუშაობდეს ინსტიტუციები ამ ქვეყანაში, მე დარწმუნებული ვარ, ბატონი ნუგზარი დღეს ჩვენ გვერდით იქნებოდა და ის გარდაიცვალა შაქრის მაღალი დოზით, აწევით, 1000 დაუფიქსირდა მას სისხლში, რასაც ცალსახად იწვევს ნერვიულობა და როგორ ნერვიულობდა ის ამ ყველაფერზე, ჩვენ ყველანი კარგად ვხედავდით“, - განაცხადა გიორგი კირთაძემ.