ჩრდილოეთ კორეის საგარეო საქმეთა მინისტრმა, რი იონგმა - მას შემდეგ, რაც ვიეტნამის დედაქალაქ ჰანოიში დონალდ ტრამპისა და კიმ ჩენ ინის სამიტი შეთანხმების და რაიმე დოკუმენტზე ხელმოწერის გარეშე დასრულდა - განაცხადა, რომ ფხენიანის პოზიცია არ შეიცვლება მაშინაც კი, თუკი ამერიკის შეერთებული შტატები შეეცდება შემდგომი მოლაპარაკებების წარმოებას.

მოლაპარაკებების დასრულებიდან მალევე აშშ-ის პრეზიდენტმა დონალდ ტრამპმა ჰანოიში განაცხადა, რომ მთავარი უთანხმოება ჩრდილოეთის მხრიდან სანქციების სრულად მოხსნას მოჰყვა, რაზეც ვაშინგტონმა უარი განაცხადა, თუმცა ჩრდილოეთ კორეის საგარეო საქმეთა მინისტრი ღამით გამართულ პრესკონფერენციაზე დაჟინებით ირწმუნებოდა, რომ ფხენიანმა სანქციების მხოლოდ ნაწილობრივი მოხსნა ითხოვა და არა სრული.

მან თქვა, რომ ჩრდილოეთ კორეამ „რეალისტური“ წინადადებები წარმოადგინა, რომელიც ასევე მოიცავადა აშშ-ის დამკვირვებლების ქვეშ იონგბიონის ბირთვული კვლევების ცენტრის ექსპლუატაციიდან გამოყვანას.

„ეს წინადადება ბირთვული განიარაღების ყველაზე დიდი ნაბიჯი იყო, რაც კი ჩვენ ამ ეტაპზე შეიძლებოდა გადაგვედგა იმ მდგომარეობის მხედველობაში მიღებით, რა ნდობის დონეც არსებობს კორეის სახალხო დემოკრატიულ რესპუბლიკასა და შეერთებულ შტატებს შორის“, განაცხადა მინისტრმა.

სანქციებზე საუბრისას კი მან თქვა, რომ ჩრდილოეთ კორეას მხოლოდ ნაწილობრივი მოხსნა სურდა სანქციების, „რომელიც აფერხებს სამოქალაქო ეკონომიკას და სპობს ჩვენი ხალხის არსებობის საშუალებას“.

მინისტრმა განაცხადა, რომ ფხენიანმა ვაშინგტონს ასევე ბირთვული და შორ მანძილზე მიმავალი რაკეტების გამოცდის სამუდამო შეჩერების წინადადება შესთავაზა. მან დაამატა, რომ ჰანოის სამიტის შემდეგ, მოვლენების განვითარების ამგვარი შესაძლებლობა შესაძლოა ძნელი იყოს.

„ჩვენი პრინციპული მიდგომა უცვლელი დარჩება და ჩვენი წინადადებები არასდროს შეიცვლება მაშინაც კი, თუკი შეერთებული შტატები მომავალში ისევ შემოგვთავაზებს მოლაპარაკებებს“, უთხრა ჟურნალისტებს ჩრდილოეთ კორეის საგარეო საქმეთა მინისტრმა.

რა განაცხადა ტრამპმა?

მას შემდეგ, რაც ამერიკის შეერთებული შტატების პრეზიდენტის, დონალდ ტრამპის და ჩრდილოეთ კორეის ლიდერის, კიმ ჩენ ინის სამიტი ვიეტნამის დედაქალაქ ჰანოიში წარუმატებელი აღმოჩნდა და მხარეებმა ფხენიანის ბირთვულ განიარაღებაზე კონკრეტულ შეთანხმებას ვერ მიაღწიეს, ტრამპმა თქვა, რომ არსებობდა პოტენციალი, რომ რაიმე დოკუმენტზე ხელმოწერა მომხდარიყო - „ჩვენ მზად გვქონდა დოკუმენტები ხელმოსაწერად“ - მაგრამ ის „არასათანადო“ იყო.

„მე არ მინდა ვთქვა, რომ ეს ჩემი გადაწყვეტილება იყო... მე მსურს ურთიერთობების შენარჩუნება - ჩვენ დავინახავთ რა მოხდება მომავლი დროის პერიოდში. მე ვენდობი მას [კიმს]“, განაცხადა ტრამპმა.

სამიტის წინ კი აშშ-ის პრეზიდენტმა თქვა, რომ იგი ჩრდილოეთ კორეისადმი პოზიტიურად იყო განწყობილი იმდენად, რამდენადაც ფხენიანი არ ახდენდა ბირთვული შეიარაღების ან შორი რადიუსის რაკეტების გამოცდას.

მისი თქმით, კიმი დაპირდა, რომ ეს ასე გაგრძელდება.

„ერთ-ერთი, რასაც კიმი გასულ ღამეს დამპირდა, ეს არის ის, რომ იგი არ გააგრძლებს ბირთვულ გამოცდებს“, აღნიშნა აშშ-ის პრეზიდენტმა.

დონალდ ტრამპმა უკვე დაასრულა სასტუმრო „მარიოტში“ პრესკონფერენცია, რომელიც მთლიანობაში 40 წუთი გაგრძელდა.

„მე ახლა ვემზადები თვითმფრინავისკენ წასასვლელად და უკან გასაფრენად შესანიშნავი ადგილისკენ, რომელსაც ვაშინგტონ დი-სი ჰქვია“, თქვა ტრამპმა.

მას ჰკითხეს, სურდა თუ არა უფრო მეტი სანქციების გამოყენება ჩრდილოეთ კორეაზე, რაზეც პრეზიდენტმა ასე უპასუხა: „მე არ მინდა სანქციების გაზრდაზე ვისაუბრო. ის ისედაც მკაცრია... ჩრდილოეთ კორეაში არის ხალხი, რომელთაც უნდა იცხოვრონ... ვიტყოდი, რომ ჩემი მთლიანი დამოკიდებულება დიდად შეიცვალა, რადგანაც მე თავმჯდომარე კიმი ძალიან კარგად გავიცანი“.

უფრო ადრე ტრამპმა თქვა, რომ ჩრდილოეთ კორეას სურდა ყველა სანქციის მოხსნა. „მათ უნდოდათ, რომ სანქციები სრულად მოხსნილიყო და ჩვენ ამას ვერ გავაკეთებთ“, განაცხადა ტრამპმა.