დაავადებათა კონტროლის ეროვნული ცენტრის ხელმძღვანელი ამირან გამყრელიძე მოქალაქეებს მოუწოდებს, რეკომენდაციები დაიცვან, რათა ხელი არ შეუწყონ ქვეყანაში ინფექციის უფრო მეტად გავრცელებას.

„გთხოვთ და კიდევ ერთხელ მოგიწოდებთ, ნუ მოვეშვებით, რასაც ვუყურებთ ქალაქში, თუ სხვაგან, ვხედავთ, რომ ადამიანები უკვე ტრანსპორტში ნაკლებად იცავენ წესრიგს, ნაკლებად დადიან პირბადით, ასევე დახურულ შენობებში. ისევ და ისევ ადგილი აქვს დიდ თავყრილობებს სხვადასხვა მიზეზით. არ იცვლება რეკომენდაციები. რეკომენდაციების შეუსრულებლობა შეიძლება გახდეს წინაპირობა ინფექციის მეტად გავრცელებისა. კორონავირუსული ინფექცია კიდევ დაახლოებით წელიწადი და მეტი არ დამთავრდება. ჩვენ უნდა ვიცხოვროთ კორონავირუსულ ინფექციასთან ერთად. დავიცვათ სწორი ბალანსი, ერთი მხრივ, სწრაფად აღმოვაჩინოთ ინფიცირებული ადამიანი და სწრაფად ვუმკურნალოთ. საბედნიეროდ, იმატებს მსუბუქი შემთხვევები და ეს კარგია.დავიცვათ რეკომენდაციები, ვიდრე არ იქნება ვაქცინა და ეტიოტროპული წამალი“,- განაცხადა ამირან გამყრელიძემ.

მისი თქმით, ქვეყანაში კორონავირუსით ინფიცირების შემთხვევათა მატება მოსალოდნელი იყო, რადგან ზაფხულში მობილობა გაიზარდა, თუმცა როგორც გამყრელიძე ამბობს, ახალი შემთხვევები ჯანდაცვის სისტემისთვის დიდ ტვირთს არ წარმოადგენს.

„ჩვენ 34 შემთხვევა აპრილშიც გვქონდა. პრინციპში, ეს პროგნოზირებადი იყო იმ თვალსაზრისით, რომ ქვეყანაში მობილობა სერიოზულად გაზრდილია. ზაფხულია, ქვეყანაში შიდა ტურიზმის სერიოზულად არის გაზრდილი. 38 შემთხვევა იქნება, 25, 30 თუ 50, ეს არ წარმოადგენს დიდ ტვირთს ჯანდაცვის სისტემისთვის. ის სრულად მართვადი და კონტროლირებადია, მაგრამ არ უნდა მივეცეთ თვითდამშვიდებას და არ უნდა შევიქმნათ ილუზია, რომ ქართველებმა დავამარცხეთ კორონავირუსი. არ დაგვიმარცხებია. ინფექცია ცირკულირებს ქვეყანაში, ამას ბევრი კვლევა და დაკვირვება მიუთითებს და თუ არ დავიცავთ ელემენტარულ რეკომენდაციებს, მაშინ საშიშროება დადგება ფართომასშტაბიანი გავრცელებისა“, – აღნიშნა ამირან გამყრელიძემ.

მისი თქმით, საქართველოში ამ დრომდე „პისიარ“ ტესტირება 386 ათას ადამიანს ჩაუტარდა.

„ქვეყანაში „პისიარ“ ტესტირების საერთო მაჩვენებელი გვაქვს 386 ათასი, ამას ემატება 151 ათასი სწრაფი ანტიგენ და ანტისხეულზე დამყარებული ტესტი და მილიონ მოსახლეზე საქართველო უკვე კარგად გამოიყურება. „პისიარ“ ტესტირების თვალსაზრისით, მილიონ მოსახლეზე 104 ათასი ადამიანია“, – განაცხადა გამყრელიძემ და დაამატა, რომ საქართველო სექტემბრიდან 500 000  „პისიარ“ ტესტს ელოდება, რადგან კონტრაქტები უკვე გაფორმებულია.

გამყრელიძის ინფორმაციით, საკოორდინაციო საბჭოს დღევანდელ სხდომაზე იყო სერიოზული მსჯელობა ვაქცინასთან დაკავშირებით და საქართველომ უკვე გააკეთა ოფიციალური განაცხადი ვაქცინების გლობალურ ალიანსში.

„შეკვეთილია დაახლოებით 700 ათასი ადამიანის ასაცრელი მასალა, რაც მოსახლეობის 20 პროცენტს მოიცავს, ასე იძლევა ალიანსი. ასევე, გვაქვს კიდევ ორი დედლაინი. 18 სექტემბერს უკვე გაფორმდება ხელშეკრულება და 8 ოქტომბრამდე გადაირიცხება პირველი შენატანი, რომლითაც გარანტირებული იქნება, როდესაც ვაქცინა დამტკიცდება სხვადასხვა მარეგულირებელი ორგანიზაციებისა და ჯანდაცვის მსოფლიო ორგანიზაციის მიერ, ის იქნება ხელმისაწვდომი ჩვენი მოსახლეობისთვის, რა თქმა უნდა, პირველ რიგში რისკჯგუფებისთვის“, – განაცხადა ამირან გამყრელიძემ.