„ის, რომ სკოლამ პანდემიის პირობებში, 2020-21 სასწავლო წლის მეორე სემესტრის მთლიანად საკლასო ოთახებში წარმატებით დასრულება შეძლო, მნიშვნელოვნად იყო განპირობებული იმ რეგულაციების დაცვით, რომელიც განათლებისა და მეცნიერების სამინისტრომ და ჯანდაცვის უწყებამ დაგვიწესა, - განაცხადა წალკის მუნიციპალიტეტის სოფელ აშკალის საჯარო სკოლის დირექტორმა, ვაჟა ზურნაჩიანმა.

GUARDIAN.GE-ის ფოტოზე: წალკის მუნიციპალიტეტის სოფელ აშკალის საჯარო სკოლის დირექტორი ვაჟა ზურნაჩიანი

მისივე თქმით, სასწავლო პროცესის წარმატებით დასრულებაში ასევე ხაზგასასმელია ის მხარდაჭერა, რაც სკოლის პედკოლექტივის, ადმინისტრაციული პერსონალისა და მშობლებისგან იყო.

როგორც მან GUARDIAN.GE-ის უთხრა, წლევანდელი სასწავლო წელი ცხრა მე-12 კლასელმა დაამთავრა და ერთი ოქროს, ერთი კი ვერცხლის მედლის კანდიდატია. ერთიან ეროვნულ გამოცდებზე წელს სკოლის 5 კურსდამთავრებული დარეგისტრირდა.

„მნიშვნელოვანია, რომ ჩვენი, სომხურენოვანი საჯარო სკოლის კურსდამთავრებულების უდიდესი ნაწილი თბილისში მიდის სწავლის გასაგრძელებლად. უკვე იმის არაერთი პრეცედენტი გვაქვს, რომ ქართულ ენაზე უმაღლესი განათლების წარმატებით მიღების შემდეგ ახალგაზრდები თავიანთ სოფელს და მშობლიურ სკოლას დაუბრუნდნენ და აქ ეწევიან პედაგოგიურ საქმიანობას და არა მარტო პედაგოგის პროფესიას ეუფლებიან, არიან ისეთებიც, რომლებიც სამედიცინო და სხვა სპეციალობებზე სწავლობენ“, ამბობს ვაჟა ზურნაჩიანი.

GUARDIAN.GE-ის ფოტოზე: წალკის მუნიციპალიტეტის სოფელ აშკალის საჯარო სკოლა

მისი თქმით, აბიტურიენტების მიერ სწავლის გასაგრძელებლად თბილისის არჩევისას რამდენიმე ფაქტორი ხდება გადამწყვეტი.

GUARDIAN.GE-ის ფოტოზე: წალკის მუნიციპალიტეტის სოფელი აშკალა - სოფლის შუაგულში საჯარო სკოლა

„ჯერ ერთი, თბილისი გაცილებით უფრო ახლოა ჩვენი სოფლიდან, ტრანსპორტიც პრობლემას არ წარმოადგენს, მეორეც, თბილისში ცხოვრება უფრო იაფი უჯდებათ სტუდენტებს, ვიდრე ერევანში. გარდა ამისა, რა თქმა უნდა, აქ ერთი ისეთი მნიშვნელოვანი ფაქტორი იკავებს უმთავრეს ადგილს, როგორიცაა ქართული ენის სათანადო ცოდნა. სადღეისოდ, სომხურენოვან სკოლებში, და რამდენადაც მაქვს ინფორმაცია, სხვა არაქართულენოვან სკოლებშიც სახელმწიფო ენის სწავლების დონე ბოლო წლებში საკმაოდ ამაღლებულია. ამასთან, ქართული ენის კარგად მცოდნეებს სამსახურებში გზა ხსნილი აქვთ და ესეც დამატებითი მოტივაციია დღევანდელი თაობისათვის“, უთხრა ვაჟა ზურნაჩიანმა GUARDIAN.GE-ის.

GUARDIAN.GE-ის ფოტოზე: წალკის მუნიციპალიტეტის სოფელი აშკალა - სოფლის შუაგულში საჯარო სკოლა

მისი თქმით, მოსწავლეთა წარმატებაში დიდი წვლილი მიუძღვით სკოლის პედაგოგებს, პედკოლექტივი კი შეკრული, მეგობრული გუნდია და ამჟამად ძირითადად ახალგაზრდებითაა დაკომპელქტებული.

GUARDIAN.GE-ის ფოტოზე: წალკის მუნიციპალიტეტის სოფელ აშკალის საჯარო სკოლის პედაგოგები
 

„მოგეხსენებათ, რომ 2019 წელს რამდენიმე ძალიან კარგ, გამოცდილ და დასაფასებელ პრაქტიკოს პედაგოგს მოუწია სკოლის დატოვება, მათ საპენსიო ჯილდო მიიღეს და ღირსეულად გავაცილეთ სკოლიდან, მათ ადგილებზე კი ახალგაზრდები მივიღეთ და შეიძლება ითქვას, რომ პედაგოგთა 95% ახალგაზრდებიითა დაკომპლექტებული“, ამბობს აშკალის საჯარო სკოლის დირექტორი.

GUARDIAN.GE-ის ფოტოზე: წალკის მუნიციპალიტეტის სოფელ აშკალის საჯარო სკოლის პედაგოგები
 

იგი მიიჩნევს, რომ პედაგოგთა რიგების ახალგაზრდებით შევსება მისასალმებელია, მაგრამ ზოგჯერ თავს იჩენს გამოცდილების ნაკლებობა, რაც დირექტორის თქმით, ბუნებრივია.

GUARDIAN.GE-ის ფოტოზე: წალკის მუნიციპალიტეტის სოფელ აშკალის საჯარო სკოლის დირექტორი ვაჟა ზურნაჩიანი
 

„რა თქმა უნდა, ახალგაზრდობის წლები საუკეთესო პერიოდია. მივესალმები მათ უფრო მეტად ჩართულობას ყველა სფეროში, მაგრამ ახალგაზრდულ წლებს არ ახლავს ის გამოცდილება, როგორც საშუალო და უფრო შემდგომი ასაკის პერიოდს. აქედან გამომდინარე, შეიძლება ითქვას, რომ მათ ჯერ კიდევ ბევრი რამ აქვთ სასწავლი, განსაკუთრებით აღმზრდელობითი, სწავლების მეთოდიკის სათანადოდ დაუფლებისა და გააზრების თვალსაზრისით.

„მოგეხსენებათ, სისტემატურად ვამოწმებ სწავლების დონეს, ვესწრები გაკვეთილებს და მინდა გითხრათ, რომ იყო შემთხვევები, როცა თავი იჩინა ნაკლოვანებებმა კლასებში ახალი გაკვეთილის ახსნის პერიოდში, როცა ამა თუ იმ მასწავლებლის მხრიდან ადგილი ჰქონდა, არ მინდა ამ სიტყვის თქმა, მაგრამ, ცოტა არ იყოს ზერელე დამოკიდებულებას. კერძოდ, ახსნილი გაკვეთილის განხილვაში ყველა მოსწავლის ჩართულობას არ ჰქონდა ადგილი. მე არ ვამბობ, რომ ვინმე შეგნებულად იყო გამოტოვებული, მაგრამ როდესაც კლასში 7-8 მოსწავლე გყავს, იქ თავისუფლად ესწრება 45-წუთიან გაკვეთილზე ყველა მოსწავლის ჩართულობა - იმის გარკვევა, რამდენად გაიგეს ბავშვებმა ახსნილი მასალა. ასეთ გამონაკლის შემთხვვებს ჰქონდა თავდაპირველად ადგილი, რაც უკვე პრაქტიკულად ამოწურულია.

„შემიძლია გითხრათ, რომ საერთო ჯამში დადებითად შევაფასებდი სკოლის მუშაობას, თუმცა ვისურვებდი, მომავალი წლიდან, ნაკლები ხარვეზი ყოფილიყოს. აბსოლუტურად იდეალური არაფერია ცხოვრებაში, მაგრამ ის, რისი გამოსწორებაც ჩვენ ხელთაა, უნდა გამოსწორდეს და ბავშვებმა მაქსიმალური ცოდნით უნდა დატოვონ სკოლის კედლები“, უთხრა GUARDIAN.GE-ის ვაჟა ზურნაჩიანმა და დაამატა:

GUARDIAN.GE-ის ფოტოზე: წალკის მუნიციპალიტეტის სოფელ აშკალის საჯარო სკოლის პედაგოგები, დირექტორი და ბუღალტერი
 

„მიმაჩნია, რომ პირველ რიგში პედკოლექტივმა უნდა მიიღოს სკოლის ხელმძღვანელი, სხვაგვარად სკოლაში მუშაობა რთული იქნება როგორც მისთვის, ისე მისი თანამშრომლებისთვის. დირექტორს მართებს სამართლიანი მიდგომა კოლექტივის თითოეული წევრის მიმართ, ეხება ეს საათების განაწილებას, პროფესიული ზრდისთვის ხელშეწყობას თუ სხვა საკითხებს. სკოლა არის მთავარი გზის გამკვლევი მომავალი თაობებისთვის. ბავშვებისთვის აქ გატარებული წლები ყველაზე დაუვიწყარ პერიოდად რჩება მათ ცხოვრებაში, ამიტომ ძალიან მნიშვნელოვანია რა ადამიანურ და საგანმანათლებლო სივრცეს შეუქმნის ის მოზარდებს, რას გაატანას ეს დაწესებულება მათ ცხოვრების ვრცელ გზაზე“.

ვაჟა ზურნაჩიანს დიდი ხნის პედაგოგიური მოღვაწეობის სტაჟი აქვს. 1984 წლიდან 2015 წლამდე აშკალის ჯერ საშუალო, შემდეგ კი საჯარო სკოლის სასწავლო ნაწილის გამგე იყო, ხოლო 2015 წლიდან დღემდე სკოლის დირექტორია. გასული წლის მარტამდე იგი ფიზიკასაც ასწავლიდა, მაგრამ გადაწყვიტა გზა მომავალი თაობისთვის დაეთმო და მხოლოდ სკოლის მმართველობით ყოფილიყო დაკავებული.

„კიდევ ერთხელ ვამბობ, გზა უნდა დავუთმოთ ახალგაზრდებს. მაშინ, როცა ისედაც ცოტა საათებია, ვარჩიე სხვებისთვის დამეთმო ეს საათები. თუმცა, შეიძლება ითქვას, რომ პერიოდულად შევდივარ კლასებში და როცა ჩემი გამოცდილების გაზიარების საჭიროება იჩენს თავს, ამას დიდი სიამოვნებით ვაკეთებ. ფიზიკა, მოგეხსენებათ, თეორიულ სწავლებასთან ერთად, პრაქტიკულ, ლაბორატორიულ მხარესაც მოიცავს და ამ პრაქტიკულ ნაწილს მოზარდებისთვის დიდი მნიშვნელობა აქვს. ნათქვამია, ასჯერ გაგონილს, ერთხელ ნანახი სჯობსო. ასე რომ, ვეხმარები ჩემს კოლეგებს, როცა ამის საჭიროებაა. ისე, რაღა დაგიმალოთ და რა თქმა უნდა, მაქვს მასწავლებლობის ნოსტალგია“, ამბობს ვაჟა ზურნაჩიანი.

GUARDIAN.GE-ის ფოტოზე: წალკის მუნიციპალიტეტის სოფელ აშკალის საჯარო სკოლის ბუღალტერი აშხენ მანუკიანი
 

მისი თქმით, რამდენიმე დღის წინ სკოლისთვის სასიხარულო ფაქტს ჰქონდა ადგილი. აშკალის საჯარო სკოლის სიმღერისა და ცეკვის გუნდმა, რომელსაც გურამ იაკობიძე ხელმძღვანელობს. რუსთავში გამართულ ღონისძიებაში პირველი ხარისხის ჯილდო მიიღო.

GUARDIAN.GE-ის ფოტოზე: წალკის მუნიციპალიტეტის სოფელ აშკალის საჯარო სკოლის პედაგოგები

„ამისთვის მადლობა გამოუცხადეს, როგორც აშკალის სკოლას და გუნდის ხელმძღვანელს, ისე წალკის რესურსცენტრის უფროსს, ბატონ არსენ ჯმუხაძეს, რომელიც პროფესიით ისტორიკოსია, ძალიან კარგად ესმის განათლების სფერო, სკოლებში არსებული პრობლემები და მისგან დიდ მხარდაჭერას ვგრძნობთ“, უთხრა GUARDIAN.GE-ის ვაჟა ზურნაჩიანმა.