სტატისტიკური ანალიზის ვებგვერდი FiveThirtyEight რომელსაც სათავეში უდგას ნეით სილვერი, რომელმაც შეერთებული შტატების 2012 წლის საპრეზიდენტო არჩევნებზე, 50 შტატში შესანიშნავად იწინასწარმეტყველა შედეგები, აცხადებს, რომ უკანასკნელი გამოკითხვების თანახმად, ჰილარი კლინტონი დონალდ ტრამპზე საშუალოდ 2-3 ნიშნულით ლიდერობს. ამის შესახებ BBC წერს.

ამასობაში კი შეერთებულ შტატებში, საპრეზიდენტო არჩევნებამდე ერთი დღით ადრე, კანდიდატები საბოლოო შეხვედრებს მართავენ ამომრჩევლებთან.

ტრამპის საარჩევნო კამპანიის თვითმფრინავი შუაღამისას დაეშვა საარჩევნო ორთაბრძოლის მთავარ ველად ქცეული ფლორიდის შტატში, სადაც გამარჯვება მთავარ წინაპირობადაა მიჩნეული, თუ მას სურს მიაღწიოს თეთრ სახლამდე.

იგი ორშაბათს, ადგილობრივი დროით დილის 11 საათზე, ქალაქ სარასოტაში თავის მხარდამჭერებს მიმართავს. ერთ-ერთი ჟურნალისტის ცნობით, ტრამპის მხარდამჭერები სამი საათით ადრე, უკვე შეკრებილნი არიან ქალაქის რობარტის არენაზე.

არჩევნებამდე 2 დღით ადრე კი FBI -მ განაცხადა, რომ ჰილარი კლინტონის ელექტრონულ წერილებთან დაკავშირებით დაწყებული ახალი გამოძიების შედეგად დანაშაულებრივი სამხილი არ უპოვიათ, რამაც „დემოკრატების“ საპრეზიდენტო კანდიდატის საარჩევნო კამპანიას ახალი იმპულსი შესძინა.

აშშ-ის ფედერალური საგამოძიებო ბიუროს დირექტორმა ჯეიმს კომიმ კონგრესს უთხრა, რომ მისმა სააგენტომ ვერაფერი მონახა ისეთი, რამაც შეიძლება მისი თავდაპირველი დასკვნა შეცვალოს.

ივლისში მან თქვა, რომ კლინტონის მიერ სახელმწიფო მდივნის თანამდებობაზე ყოფნისას მგრძნობიარე მასალების მისი კერძო ელექტრონული წერილების სერვერის გამოყენებით გადაცემის გამო, ადგილი ჰქონდა დაუდევრობას, მაგრამ არა დანაშაულს.

საკითხმა სიმწვავე მას შემდეგ შეიძინა რაც ფედერალურმა საგამოძიებო ბიურომ არჩევნებამდე 11 დღით გასცა ორდერი ჩაეტარებინა გამოძიება კლინტონის მთავარი მრჩევლის ელექტრონული წერილების მონაცემთა ბაზის შესწავლის თაობაზე.

ელექტრონული წერილები ჰუმა აბედინისაგან, სავარაუდოდ, მისი ცალკე მცხოვრები ქმრის, ყოფილი კონგრესმენის ანტონი ვეინერის პორტატულ კომპიუტერში იპოვეს.

გავრცელებული ინფორმაციით, ძიება 650 000 ელექტრონულ წერილს ეხებოდა.

საგამოძიებო ბიუროს სჯეროდა, რომ აღნიშნული ელექტრონული წერილები შესაძლოა კავშირში ყოფილიყო მის წინა გამოძიებასთან, რომელიც ობამას ადმინისტრაციაში ჰილარი კლინტონის სახელმწიფო მდივნობისას მის მიერ კერძო სერვერის გამოყენებას უკავშირდებოდა.

არჩევნებამდე დარჩენილი მცირე დროის პერიოდში ფედერალური საგამოძიებო ბიუროს მიერ დაწყებულმა ახალმა გამოძიებამ ჰილარი კლინტონის მოწინააღმდეგე, დონალდ ტრამპი გააძლიერა.

კომიმ კვირას დაწერა: „ჩემი წერილის შემდეგ ფედერალური საგამოძიებო ბიუროს გამომძიებელთა ჯგუფი 24 საათის განმავლობაში მუშაობდა დიდი მოცულობის იმ ელექტრონული წერილების შემოწმების მხრივ, რომელიც მიღებულ იქნა მოწყობილობიდან, რომელიც სისხლის სამართლის კავშირში არმყოფ გამოძიებას ეხებოდა.

„ამ პროცესში, ჩვენ განვიხილეთ ყველა კომუნიკაცია, რომელიც ჰილარი კლინტონისადმი ან მისგან იყო, იმ დროის განმავლობაში, როცა იგი სახელმწიფო მდივნის პოსტს იკავებდა.

„ჩვენი განხილვის საფუძველზე, ჩვენ არ შეგვიცვლია ჩვენი დასკვნები, რომელიც გამოვხატეთ ივლისში, მდივან კლინტონთან დაკავშირებით“.

ჰილარი კლინტონის საარჩევნო კამპანიის თვითმფრინავის ბორტზე, „დემოკრატების“ კანდიდატის გუნდმა განაცხადა, რომ მათ ყოველთვის სჯეროდათ ამგვარი შედეგის დადგომის.

კომუნიკაციების დირექტორმა ჯენიფერ პალმიერიმ მედიას უთხრა: „ჩვენ მოხარულები ვართ, რომ ეს საქმე გადაწყვეტილია“.

მაგრამ ტრამპის გუნდმა FBI-ს გადაწყვეტილება მკაცრად გააკრიტიკა.

„რესპუბლიკელების“ კანდიდატის მრჩეველმა ნიუტ ჯინჯრიჩმა „თვითერზე“ დაწერა: „კომი უზარმაზარი პოლიტიკური ზეწოლის ქვეშ უნდა იმყოფებოდეს, რომ ამგვარ დათმობაზე წასულიყო, რომ გამოეცხადებინა რაღაც ისეთი, რაც შესაძლოა რომ მან არც იცოდეს“.

8 ნოემბრის საპრეზიდენტო არჩევნებამდე ერთი დღით ადრე, იმ ფონზე, როცა თეთრი სახლის დასაკავებლად ბრძოლამ კულმინაციას მიღწია, ონლაინ პლატფორმებს ირლანდიიდან აიოვამდე, მილიონობით ადამიანი ჰყავთ ჩართული სანაძლეოს დადებაში, იმ იმედით, რომ ხელი გამოჰკრან უზარმაზარ ფინანსურ მოგებას „დემოკრატი“ ჰილარი კლინტონის თუ „რესპუბლიკელი“ დონალდ ტრამპის გამარჯვებით. ამის შესახებ „როიტერსი“ წერს.

დიდ ბრიტანეთში ბაზირებულმა სანაძლეო ონლაინ ჯგუფმა Betfair-მა განაცხადა, რომ მისი „შემდეგი პრეზიდენტის“ ბაზარი იმისთვის დაფუძნდა, რომ გახდეს ყველაზე დიდი სავაჭრო სივრცე, რაც კი ოდესმე ამ სფეროს უნახავს და მოელიან, რომ ის დიდი ბრიტანეთის ევროკავშირიდან გასვლის თაობაზე ჩატარებული რეფერენდუმის დროინდელ ვაჭრობასაც გადაასწრებს.